經歷三次人生低谷 唐文龍:際遇好難講
2018年01月12日18:22

唐文龍 (Michael)喺《溏心風暴3》同陳敏之不倫戀嘅故事線題材新穎,吸引唔少觀眾收睇,今次Michael就分享自己事業大起大跌,低潮時如何克服及自處。又大方分享感情狀況及理想對象!

原文:東方新地

攝影:Killy Sung

場地提供:唐人館

點睇Nic呢個角色?

《溏心3》Nic呢個角色其實好敏感!因為係婚外情嘅角色,最初接嗰時都驚,十一年冇返嚟,突然間做一個咁爭議性嘅,會擔心係咪會犯眾憎,但諗深一層,自己都經歷咁多,亦都係有挑戰性嘅角色,有戲畀我做,橫豎都係,咪博一鋪囉!

《溏心3》跟陳敏之的不倫婚床戲成熱話,時下男藝人興起騷肌賣性感拍廣告,「我比較謹慎啲嘅,呢方面我難搞㗎,睇番係咩性質。」如果無做藝人會點?

我畢業後有做過設計,當年有個女藝人嘅經理人,叫我做一個女歌手嘅設計師,我就由美國返嚟,但佢不單冇搵我做設計師,佢仲叫我做兼職模特兒,offer part time嘅人工畀我,令我痛心欲絕,但因為我返咗嚟,霎時間我都要搵工做,就去咗旺角Giordano做Sales,但因為我學歷好好(時裝設計博士),搵工能力都強,做咗幾個月,我就搵咗設計工作,93、94年,我搵緊大概三萬蚊人工,我嗰時係朋友入面搵到最多錢,嗰時我公司喺力寶中心,個環境幾靚,如果冇入呢行,我應該做緊設計師,甚至,理工大學錄取過我做教授,但我冇做到,可能我會喺理工做咗教授,以我性格,應該結咗婚生咗仔。

人嘅際遇好難講有無人生低谷?

三次!97年,我簽咗華星唱片,但好無奈,佢哋執咗,我錄咗音,未出碟,team人就被解僱咗,我淨係上過《Sunday新地帶》同《週末任你點》,我呢生人連《勁歌金曲》都冇去過。碟出唔到,又冇錢,冇嘢做,好彩去咗台灣出國語碟,兩年內出咗三隻國語碟,係救咗我,跟住返嚟香港拍電影,拍咗《浪漫風暴》、《古惑女之決戰江湖》,聲勢幾唔錯,無奈遇到翻版VCD嘅出現,我又未真正上到位,跟住個浪一路跌,嗰時我經理人離開咗公司,我係好依賴經理人嘅人,唔識social、飲酒,冇錢交租,我喺旺角租間七十呎板間房,我日日喺樓下買快餐食,食咗兩年,唔要飲品平三、四蚊,因為當時經濟真係唔得。後尾大佬Willie(陳自強)打畀我,簽咗我兩年,我唔係怪邊個,人嘅際遇真係好難講,公司又唔係成日開戲,又有好多人,吳彥祖、尹子維、王合喜,所以我同公司講,不如推介我去TVB,幾個月後,就入TVB拍劇,拍咗幾個劇,就拍《十月初五的月光》,短短喺TVB六、七年,拍咗唔少嘢。

唐文龍非常熱心環保,希望以自己的力量,鼓勵大家為環保出一分力。點解當初會離開TVB?又點解會返嚟?

其實TVB對我好好嘅,我想出去闖下、學習下,同樣地,當時同公司喺條件方面未得到共識,亦都係時候出去,睇下自己架生夠唔夠,所以06年尾離開咗TVB,將重心轉移去內地,頭幾年,人仲喺香港,得閒會上上海或者北京,我發展都還可以,直到大概兩年後,我個人唔係好識去應酬,當時諗住上咗去,見過面,就等人哋搵我,但結落好多種子可能唔會即刻發芽,甚至永遠都唔會發芽,識一百個人,可能一、兩個會發芽,但都唔知幾時,後尾我明白到真係要搬過去,的起心肝搬咗去北京住,上到去,個個都要飲酒,佢哋個文化係咁,我由一個唔飲酒嘅人,練到後尾係嘔唔出,酒量唔會輸畀(洪)天明。學懂咗結交人脈網,眨下眼四、五年。初頭反正唔錯,搵到錢,後尾又沉咗好幾年,係搵唔到。曾經有半年到九個月係冇嘢做,死慳爛慳食麵包、麥皮,都唔夠供樓,要靠屋企人幫手。

說到會否打鐵趁熱,為TVB多拍劇,「我永遠歡迎每個合作嘅機會,其實警匪、科幻、神魔類嘅戲我都有興趣,我有玩詠春、洪拳、泰拳、我係鍾意運動嘅人,動作戲都絕對歡迎。」想喺香港識女朋友

我返咗嚟香港三年多啲。其實我繼續喺內地發展,不過搬返嚟香港住,事關我掛住香港。我去咗內地五年,學習咗好多嘢,亦都經歷咗一啲嘢,建立咗一個人脈網,其實呢個世界冇夠唔夠,我可以一路長駐喺內地,繼續工作,應該會愈嚟愈好,但我又睇到自己四十幾歲,好掛住香港,另一樣嘢係我當時想喺香港搵番個女朋友,咁要喺香港先識到香港女仔㗎!第二就係我希望喺香港電影圈有發展。

雖然話想拍電影,其實電視我唔抗拒,我飲TVB奶水大,只要啱嘅角色、劇本我就會拍。其實珍姐(高層曾勵珍)早兩年半前搵過我拍兩部劇,係主角嚟,一部係民初,我唔係好想拍,我就推咗,不久後,有部時裝《天眼》,同鄭嘉穎,都係主角,我應承咗,無奈TVB延咗期,但我後面嘅期已經接咗大陸嘅嘢,可惜嘅,但冇辦法,後尾有監製搵我拍《殭》,但個比重得五集,我唔係介意,但珍姐搵我拍個主角我冇拍,若果我拍個五集,唔係好禮貌,所以冇接到。

返咗嚟發展成點?識唔識到女朋友?

呢三年有date過女仔嘅,但係未真正搵到啱嘅人。其實比起識女朋友,我返嚟更加主要目的係真係想希望香港電影圈容納到我,我都講得好似好白,唔係話唔拍香港電影我會冇飯開,絕對唔係,但我係香港演員,我想參與香港電影,其實內地我繼續有嘢做,好坦白都唔需要香港。

無綫台慶頒獎禮在即,說到對獎項的看法,「我入行咁多年未攞過一個獎,有嘅話係開心㗎!但觀眾認同更加重要,尤其依家網上世界,觀眾嘅noise係好緊要。」你48歲,你話返嚟識女仔,係咪即係你急住結婚?

我爹哋急,成日鬧,鬧到就嚟唔鬧,媽咪就擔心我將來年紀愈嚟愈大,始終想我有個人,我都希望有婚姻嘅,有冇辦法生小朋友就睇有冇本事啦!我鍾意豐滿嘅、白雪雪,呢個係改變唔到,膚色好tan我反而唔鍾意,但呢個世界講就咁講,真正娶嗰個,可能又唔係咁,外形當然想符合理想,但最重要係共同價值觀,因為要行落去,兩個人生活形態夾唔夾係緊要過任何嘢。我有date女仔,不過傳媒未必咁啱影到。

諗過幾萬次放棄咁多年嚟,有冇諗過放棄?

諗過幾萬次,但做人,尤其做藝人要有一股阿Q精神,呢股阿Q精神一係害死你,一係令到你成材、成器,冇人會知道,要睇彩數。離開咗TVB嗰十年,自己有段期間都掙扎過,有時都唔係好想見朋友、收埋自己,有時唔係朋友介意你,而係你介意自己,嗰個moment好似冇辦法面對咁,要搵番自己嘅步伐,由趴咗喺度、爬番喺身跪喺度再爬番起身,Rocky嗰套好啱,最犀利嘅拳手唔係喺個台上打得幾好、幾精彩,其實係喺你跪喺度嘅時候,你仲可以捱打,起番身,呢個先係真正嘅拳手。

問到訪問當天的留鬚造型是否特別設計,「係嘅,想襯番角色個CEO look,以前TVB唔畀留鬚,我喺大陸拍嘢,都有留過鬚,《溏心3》我剃得好乾淨,但依家冬天,玩少少造型。」依家喺娛樂圈你係以咩心態?

男一、二、八、九其實唔係我哋講,只能夠盡力去爭取,係咪男一唔係努力可以得番嚟,而係個天畀你!往往觀眾喜歡,或者故事造就出嚟嘅人物,係咪最好戲呢?表現最好呢?其實好多時都好多因素,喺我嚟講,我都有尊嚴,我都會揀嘅,男一、二我都OK,男三我要睇係咩戲,好似《溏心3》話我男三可能都高攀咗自己,因為王浩信同黃宗澤一定係男一,夏雨哥直頭係庄㖭!所以男幾號幾抽象,我唔係執著得咁緊要,但要有戲做、有個比重喺度!呢個角色唔失禮,又可以同公司交番隻手,我又掛住香港,我覺得呢個係好嘅timing去嘗試,入賭場賭一鋪,因為人生就好似入咗賭場,尤其是演藝圈,係咪真係攞最多錢入場嘅人就會贏最多錢呢?只能夠一步步耕耘。

嚟緊有咩動向?

傾緊一部國內劇,四億人民幣投資,做反派,反一或者反二,另外,同香港一啲導演都初步接觸傾緊。

間中參演港產電影《寒戰》、《風暴》等。在美國讀書、長大,英語了得,2013年接拍由荷李活巨星奇洛李維斯(Keanu Reeves)執導的中美合拍動作片《太極俠》。你有幾多吋胸肌?每日做幾耐運動?

男人嘅嘢,我冇量度呢啲嘢,呢個年代,又唔需要話幾多吋,係整體個比例啱、舒服。胸肌係因為細個喺美國,我讀嗰間學校得兩個中國人,我成日畀人恰,我就求爸爸買咗枝Push up bar,上咗喺我房門,我發誓每次經過都做,因此我破咗學校做Push up紀錄,我以前6個Push up都做唔到,半年後,21個、28個,狀態好,連續做三十幾個Push up都得,依家我anytime做到二十幾個,所以胸肌比較發達啲。

過往走皮褸大隻型男路線,現時轉走成熟風,大玩熟男誘惑。

相關文章:

《3日2夜》新女神卓楓而 激似Angelababy?

同陳豪「HeHe」好受落 森美:想同佢拍外傳,叫「HeHe哈哈」!

《誇世代》結局篇 香港變屍城 陳豪變宇宙大王

關注我們Facebook專頁
    相關新聞
      更多瀏覽