富貴唔憂做 關菊英嘔凸私伙拍《溏心3》
2018年01月05日18:52

《溏心風暴》系列向來奸角最搶鏡!熱播中的《溏心3》, 除咗進取小三陳敏之、兇狠名媛莊思敏,識睇一定要睇巴辣 到一個點、次次出場都嘈到拆天嘅菊姐關菊英。一向投資有道、10年前回流又遇上富貴密友Willy,近年以享受生活為主,拍《溏心3》前更停工兩年遊山玩水,拍劇純粹為同李司棋、夏雨、米雪班老友計敘舊,酬勞低冇所謂、出動埋私伙又點話!

撰文:東方新地

圖片:新傳媒圖片庫、TVB劇照、關菊英微博

關菊英 嘔凸私伙拍《溏心3》

拍足三輯、hit足三輯,《溏心》系列雖然次次有齊花旦小生坐鎮,又例必請埋外援幫拖,不過論到台柱,肯定係四大甘草夏雨、李司棋、米雪同關菊英。加埋將近300歲、拍足半年劇、又要幫手谷宣傳,59歲菊姐日前一個人行色匆匆精神欠佳去到藥房配藥、疑似為套劇又捱出病。

9秒9落保母車去藥房買藥,又再9秒9跑上車走人,菊姐解畫,因為禁區停車,怕司機被抄牌。菊姐:難得有次係拍劇冇冧廠

本刊致電菊姐求證,好彩虛驚一場:「唔使擔心,係天氣乾燥又容易鼻敏感,我習慣有藥跟身噴鼻,去補貨啫!拍《溏心3》雖然拍足半年,但好好彩,劇組都好錫住我哋,冇話捱到病、又冇話唔夠瞓,難得有次係拍劇冇冧廠喎!」

關菊英
關菊英
用足半年拍《溏心3》、再馬不停蹄忙宣傳,日前出席完宣傳活動後, 菊姐行色匆匆飛撲去藥房買藥。

抖足兩年周遊列國

15年約滿無綫後抖足兩年,年初肯出山拍劇,菊姐同一班老戲骨一樣,志在同班《溏心》系列老拍檔聚頭,明知酬勞唔多、更同內 地劇酬勞差天共地一樣在所不計。10年放售加拿大大屋回流香港、8年前公開同「公仔麵大王」周文軒姪女周偉利Willy同性密友關係,唔憂做菊姐過去兩年坐郵輪豪遊歐洲、又去過杜拜同俄羅斯旅行、聖誕再同Willy遊多轉日本,富貴生活唔止唔使靠劇酬幫補,更為效果出動唔少私伙:「唔係全部私伙嚟,手袋有贊助、有啲衫都係著公司嗰啲,其他衫、錶同首飾我真係有出動自己嗰啲,不過又唔可以太名貴。都要跟番劇情,始終奶茶王弟弟屋企出身低下、唔同哥哥咁有錢,啲嘢太靚唔合理嘛!」不過據知菊姐在劇中的私伙衫件件名牌,只係款式低調,為效果好,菊姐唔介意貼錢拍劇!

八年前公開與周偉利Willy親密關係,菊姐自言為套劇忙足一年,聖誕節才終於有機會放假陪Willy外遊日本。朱義盛NoWay

復出拍劇賺錢事小,同班老友記為好劇本再聚頭事大,所以菊姐表示除咗手袋有官方贊助,鑽錶、首飾大部分都係私伙靚嘢。上月出發雲頂登台,菊姐自備鑽石耳環同頸鏈,貴氣行頭冠絕同行一班《溏心》演員。

生活富貴無憂,菊姐話第一輯《溏心》後年年同夏雨、司棋姐同米雪聚會兩次,不計酬勞復出,只想同班老友聚頭。

闊太生活

15年同無綫約滿後,菊姐放足兩年大假,同密友Willy作伴周遊列國遊山玩水,今年才再簽入邵氏做旗下藝人,不過短期之內都不會再拍劇。自爆同 Willy一樣愛熱鬧,菊姐日常經常被拍到一身闊太裝束去高級超市買菜買肉,然後等司機接 載回家招呼朋友。

買首飾一樣專攻高檔專門店,早前便被本刊拍到在西班牙貴族珠寶店Arte入貨。

感情生活前衞,品味一樣有自己一套,所以拍劇都有要求,經常出動私伙首飾同名牌手袋。

綜藝節目
綜藝節目

相關文章:

談學生壓力大 分享減壓方法 麥明詩:「喊完就可以東山再起!」

攰爆陪囝囝去嘉年華 張栢芝 陪玩飛天 嚇到面青

郭富城連場勁歌熱舞 瘋狂托眼鏡亦不失霸氣

關注我們Facebook專頁
    相關新聞
      更多瀏覽