【頒完喇】城城驚喜現身十大 李克勤14.5個獎稱王
2018年01月05日07:00

做咗爸爸冇耐嘅郭富城呢晚現身《第40屆十大中文金曲—我和你音樂會》,仲先後唱出《對你愛不完》、《狂野之城》、《唱這歌》!

城城之後接受訪問,佢解釋點解16年嚟都冇參加頒獎典禮:「咁多年都見我唔出席都知咩事,我嘅重心會放喺電影嘅時間多啲。」又話自己要喺唔同時間定唔同嘅目標:「要不斷進步同學習,就好似攀山咁,要憑理念不斷超越自己!」

今次港台嘅「十大中文金曲」,以回憶做主題,大部分獎上個月頒晒,呢晚就以音樂會為主。陳奕迅連拎3個大獎,加埋之前嘅「優秀流行歌手大獎」同「優秀流行國語歌曲獎」,一共喺港台手上拎五個獎,同李克勤平手。但四台頒獎禮累積計算,李克勤以14.5獎稱王!

Eason就話,自己去過好多地方,但香港始終令佢最舒服!至於克勤話:「自己都好開心,因為係收穫豐富嘅一年。參加埋今晚嘅頒獎禮,完成咗自己嘅承諾,聽日會放一日假,同老婆去燭光晚餐,之後要開工。」

關注我們Facebook專頁
    相關新聞
      更多瀏覽