【老闆幫手擇日】木偶哥宣佈封盤:盡情妒忌歐陽巧瑩啦
2018年01月01日07:00

大台《2017年度勁歌金曲頒獎典禮》星期六晚已經結束,星夢一班歌手完咗之後就開慶功宴,點知老細何哲圖有料爆,話「木偶哥」林師傑已經「封盤」,即將同女友歐陽巧瑩結婚!

話說佢哋一班人食飯時玩直播,林師傑話:「今年要認真多謝老闆,因為畀咗好多鼓勵我。」有人問幾時結婚,呢個時間何哲圖就出手:「我同師傑講,遇到珍惜嘅女朋友就要珍惜喇,要勇敢去講畀人聽,拍咗幾年拖要同對方講要定落嚟,咁師傑同佢好好嘅女朋友講咗啦。」

「紅都面晒」師傑索性正式宣佈:「我已經封咗盤,所以大家啦,盡情去妒忌歐陽巧瑩啦,羡慕佢啦!」之後佢話:「喺一個唔係咁靚嘅時候,遇到歐陽巧瑩入嚟我生命,戇戇居居咁三年後,我哋依家準備籌備結婚啦,希望大家可以祝福我哋!」又透露,婚期已經由老闆幫佢擇咗!

其實早喺12月中,佢兩個出席一個活動時,已經話大時大節唔會慶祝,想儲錢買樓結婚,似乎早已經暗示「好事近」!

關注我們Facebook專頁
    相關新聞
      更多瀏覽