【百萬富翁】吳雨答錯晒 陳志雲寸爆:你點做CEO
2017年12月24日07:00

陳志雲為亞視主持嘅《百萬富翁2018》,星期六安排咗傳媒朋友都睇廠景,行政總裁吳雨亦有試玩!

睇番今次廠景佈置同玩法,其實同當年陳啟泰主持嘅《百萬富翁》好似,三個錦囊都依然係「50.50 」、「打電話」及「問現場觀眾」。

試玩嗰陣,吳雨玩咗兩條題目,包括:「連續性合約受僱女性僱員,可享有多少星期有薪產假?」點知答錯咗,吳雨話:「我太太嗰陣時未有呢條條例。」陳志雲就笑佢:「你公司有冇女僱員架?咁都答錯,唔知你點做行政總裁架。」

問到點解第一條保險線由以前$8000跌到依家得$6000,吳雨話係跟英國原裝《百萬富翁》:「版權持有人要求,佢哋計番條數,呢個先係正確,以前版本錯咗。」

另外,日前亞視話重拍劇集《我和殭屍有個約會》,但美國Fox就發咗聲明,指自己仲持有《殭屍》、《情陷夜中環》、《肥貓正傳》、《縱横四海》及《我和春天有個約會》版權。

吳雨回應話《殭屍》一早已經賣咗畀好多人:「背後真係好混亂,依家都同FOX了解緊。咪大家傾,合作拍嘢咋嘛。」

關注我們Facebook專頁
    相關新聞
      更多瀏覽