5個步驟,超風速進入曖昧期
2017年11月26日18:30

成日見到有文章教你「如何結束曖昧期,正式戀愛!」

但問題係……

你同佢連「曖昧關係」都未開始……

究竟一個曖昧期係點形成?又點加速完成?

請大家坐定,準備好,進入超風速曖昧之旅!

第一步:接觸次數頻率增加

所有曖昧期,都必需要不斷接觸。

冇一個曖昧期係大家每星期得十個msg。

而要加速,

最好就係雙方接觸次數由0 一下子 變100!

短時間嘅多次接觸,

會令雙方都侵入對方嘅世界,如果融得埋,就變二人世界!

第二步:但係點先可以0變100?

冇錯,呢一環好重要。

你要搵機會,或自製機會。

如果你哋係同事,最好緊係一齊做Project!

係同學,都係最好一齊做Project!

係朋友,都要搵個Project一齊做!

一齊跑步又好、一齊整嘢食又好、一齊研究歷史都好,

總之要「合理地保持聯絡」。

第三步:獨一性

當你哋都可以日傾夜傾,

就要加入「獨一性」。

好簡單,即係有啲嘢,只係「同你一個會做」、

或者「第一次同男仔度過」。

男仔一聽,中招率達90%。

第四步:曖昧Emoji來引領

呢個世代,要曖昧,唔使用言語嘅,

Emoji已經可以代勞。

簡單嚟講,一出現「錫錫類」同「心心類」Emoji,

已經有一定破壞力。I mean破壞友情,產出愛情。

第五步:小脾氣、小爭執

嗱,唔係叫你反佢枱!只係一啲小淘氣嘅行動。

等佢又氹下你,大家打打罵罵,慢慢就變打情罵悄,

最後打得火熱……

恭喜你,到時你同佢已經好鬼曖昧啦!

Related Articles

關注我們Facebook專頁
    相關新聞
      更多瀏覽