【咁邪?】李思捷惡搞完丁蟹 恒指即穿3萬大關
2017年11月24日07:00

《齊癲大聖福祿壽》接力《我愛EYT》,王祖藍、李思捷同阮兆祥繼續「扮嘢」,《超耷英雄》入面仲惡搞蝙蝠俠、神奇女俠同狼人!

趣劇環節亦繼續「抽水」,好似星期二晚,王祖藍扮陳自瑤,暗串老公王浩信喺《踩過界》中艷福無邊,星期三晚李思捷就扮鄭少秋喺《大時代》中嘅丁蟹,惡搞《胡說八道真情假期》,企圖破壞佢哋之間嘅友誼!

不過最估唔到嘅係,「丁蟹效應」已經勁到連「扮」都會出事!點解咁講,咁多年嚟只要鄭少秋有作品出街,恒生指數都會下跌,呢日李思捷扮完丁蟹後,星期四恒指曾經一度跌409點,收市失守3萬大關!

不過好在星期四晚呢個角色已經冇咗,股民們似乎可以繼續瘋狂!

關注我們Facebook專頁
    相關新聞
      更多瀏覽