戴蘊慧騷腿首唱《我係小忌廉》 譚偉權唱「12隻恐龍去野餐」
2017年09月24日16:28
王馨平唱《生命有價》;陳浩民唱《寵物小精靈》。

【星島日報報道】不少經典動漫歌曲都陪伴8、90後成長,《我係小忌廉》、《寵物小精靈》、《千年女王》、《龍珠二世》等,見到歌名都自動波哼到幾句。昨晚播出的《流行經典50年》請來張崇基、張崇德、唐韋琪、露雲娜、戴蘊慧、戴辛尉、譚偉權等原唱者,獻唱多首經典兒歌,難忘的童年回憶湧現。

已是嬷嬷級的美魔女戴蘊慧,著上短裙仔首次公開演唱《我係小忌廉》,再孖細妹戴辛尉合唱舊歌《西飛客機》。兩姊妹晒唱功加靚樣,保養得宜獲網民讚唔識老。「Gary哥哥」譚偉權當年做《閃電傳真機》主持時,你又有否印象?他現身唱《白石嶺公園》,令不少只記得歌詞的網民驚覺「原來十二隻恐龍去野餐真正歌名係《白石嶺公園》」。

另外,王馨平亦唱出《生命有價》;唐韋琪的《夢中天使》勾起不少觀眾兒時睇《長腿叔叔》的回憶。張崇基和張崇德高歌《龍珠二世》,網民大讚有台型,唱得悅耳。北上搵銀多年的陳浩民現身唱《寵物小精靈》,如果扮埋動漫人物小智、拎住比卡超公仔,成個畫面更豐富。

關注我們Facebook專頁
    相關新聞
      更多瀏覽