胡說八道會玩大乳操 杏兒揸智雯胸嘲冇料到 
2017年09月19日14:45
胡說八道會在鏡頭前放得開,玩揸胸之餘,又露香肩及玉背。

【星島日報報道】《胡說八道真情假期》昨晚首播,胡定欣、胡蓓蔚、 胡杏兒、黃智雯、李施嬅、姚子羚齊齊去澳洲拍旅行節目,出發前已經激動到爆,事關黃智雯呃大家話有工作在身未去到澳洲,原來一早到達機場,坐定定等好姊妹入閘。眾人見到黃智雯即開心尖叫,分貝極高,兼且喜極而泣,大肚婆胡杏兒仲嗌肚痛添,小心啲喎。

「胡說八道會」去到澳洲「裝假狗」扮大肚,黃智雯帶頭教孕婦胡杏兒做「超級Push up大乳操」;成班太熟無所謂,在鏡頭前非常放得開。胡杏兒一手摸落黃智雯胸部,說:「我知道你好需要,好缺乏。」笑好姊妹胸細。胡定欣就讚姚子羚上圍最出眾:「姚子羚係我哋入面最瘦,應細則細,應大則大。」胡杏兒更叫對方做「立花子羚」,大肚谷奶後的上圍僅僅拍得上姚子羚。

之後「胡說八道會」去做Spa、浸浴歎世界,露肉組有胡定欣、黃智雯、李施嬅,包住浴巾浸牛奶浴,露出香肩;姚子羚最搏,趴在牀上做推油按摩,露晒成個玉背,似乎「真空」上陣拍節目。

3個女人1個墟,「胡說八道會」計埋係兩個墟,講起野上嚟,音量有返咁上下。有網民紛紛嗌頂唔順「睇到未到一半已經頂唔順,成日喺到呱呱嘈」、「仲衰過小朋友去旅行!成日叫!煩死!轉台!」、「係咁尖叫做乜鬼」、「好似個個爭住搶鏡咁」。亦有網民諗起《學是學非》同樣成大班女仔好嘈,不過是非精比起「胡說八道會」可愛得多。

關注我們Facebook專頁
    相關新聞
      更多瀏覽