【繼續罷工】韓國電視台爆醜聞 《兩天一夜》李準基都出事
2017年09月15日07:00

韓國MBC電視台員工,因不滿社長及管理層過度干涉節目製作,鬧爆社長獨裁,要求佢落台,員工自上星期一起已經發起大罷工,綜藝節目包括《無限挑戰》、《黃金漁場》及《我獨自生活》等已經相繼停播。

另一間電視台KBS,曾經喺2012年3月至6月爆發長達95日嘅工潮,今次亦面對同樣嘅情況,令電視台相隔5後年再次發起大罷工。其中,最受歡迎嘅綜藝節目《兩天一夜》同《超人回來了》導演,都有參與罷工行動,據報道,《兩天一夜》製作組已經取消星期五嘅錄影,不過就未知會唔會因為咁而停播;《超人回來了》本身就冇錄影工作,而另一綜藝節目《Happy Together 3》就未受影響。

另外,最近有韓媒公開南韓前總統李明博在任時,為咗主導輿論文化,設立黑名單,禁止藝人亮相節目,當中包括《步步驚心》男星李準基!

新聞出街後,唔少粉絲都好擔心,李準基亦好感激粉絲支持,佢喺Instagram上載近照兼留言,叫大家唔好為佢擔心。

至於《無限挑戰》製作組及節目內容,亦被指受到前總統朴槿惠干涉,睇嚟今次事件牽連甚廣,短時間內未必可以解決到!

關注我們Facebook專頁
    相關新聞
      更多瀏覽