港姐爆大冷 Do姐手握兩票定生死 被圍插變箭靶
2017年09月11日17:58

今屆香港小姐獎項塵埃落定, 23歲的雷莊兒奪得雙料冠軍,一夜間紅遍網絡,由樣貌身材以至棚哨牙都被網民狂轟唔達港姐水準,最慘係投佢神聖兩票的Do姐鄭裕玲,亦因網民不滿賽果慘遭圍插,直指「Do姐你玩晒啦!」,連壓慣場的Do姐都因網民爆炸力承認今次做評判有壓力同責任好大!

手握兩票定生死 Do姐 被圍插變箭靶

第45屆香港小姐競選棄全民投票,交畀10位星級評判定生死,進入三甲的1號, 4號及5號,宣布4號黃瑋琦奪得季軍後,剩低1號同5號對決,由10位星級評判現場投票,草蜢三子、宣萱及陳凱琳均投 1號一票,合共獲得五票的1號,比叻哥、黃心穎、苗僑偉、王浩信投的 5號原本領先,但最後由Do 姐這位導師兼校長投票,最初以導師身份投第一票時,Do姐投給5號雷莊兒,令二人打成平手,大會安排Do姐做校長,比其他9位導師多出額外一票,最終Do姐將這神聖一票畀了5號,令雷莊兒成今屆港姐冠軍!

今屆港姐冠軍雷莊兒,亞軍何依婷(左)以及季軍黃瑋琦(右)全都爆大冷!

8號伍樂怡(右二)大熱倒灶三甲不入,輸畀左起分別得亞軍的1號何依婷、季軍4號黃瑋琦及冠軍5號雷莊兒,以及得BigBigChannel最受歡迎港姐的10號張寶欣。

袁偉豪新歡張寶兒頒獎畀細妹張寶欣。

10位星級評判由阿叻、Do姐、草蜢、王浩信、陳凱琳、宣萱、黃心穎及苗僑偉組成,Do姐更成導師的校長,多出決定性一票!

賽前聲勢唔算大,喺網絡未引起太大迴響,但卻因Do姐的兩票當選、一夜間成為雙料冠軍的雷莊兒而成為話題,雷被網民洗版式鬧爆唔夠靚做冠軍港姐,高頭大馬的雷莊兒被指身材過分大隻,一笑成棚哨牙現晒形,甚至被攻擊似人妖!

雷莊兒棚牙相當突出,在港姐答問環節被問到如果阿叻係佢親生爸爸, 會點說服叻哥認番佢,就九唔搭八話:「想知佢狀態係點!」搞到森美忍唔住問:「做你老竇要知狀態係點?」最後要阿叻幫口解圍。
原本1號以五票領先,最後由擔任校長評判的Do姐投神聖兩票,扭轉大局!

憑良心投票

網民群起杯葛,搞到連手握兩票生殺大權的校長級評判Do姐,亦遭網民圍插慘成箭靶,當晚完騷,Do姐接受訪問時話:「諗住扮靚靚、舒舒服坐低做評判,冇諗過咁大壓力同責任。」不過,見慣風浪嘅Do姐第二日在主持《口水多過浪花》電台節目時,就公開表態繼續力撐5號攞獎冇造馬成份,更指出自己在決賽前一天才收到公司通知有兩票在手。Do姐話:「係憑良心投畀5號,絕對冇造馬成分,我係睇整體表現,除咗才藝表演我冇睇,但我比其他人著數,之前已睇咗班女仔一輪,對佢哋有啲認識,我係憑良心, 5號表現好好,每個範疇都OK,咁當然人人都有缺點!但絕對冇話咩造馬,有晒會計師喺度好難做到!」

賽果引爆全城熱話,雷莊兒遭網民洗版式攻擊!

曾做內衣Model

被網民大肆抨擊的雷莊兒,攞獎後更被起底有個富貴阿爸,父親雷葆文是香港十大設計師之一,物業遍布中港加,估計身家過億,而雷莊兒還被揭參選港姐前曾經擔任內衣model,在其model公司網頁內,就有唔少雷莊兒的泳衣相,相比參選時的泳裝,當時身材更魁梧的她,睇落似足健美小姐,相信網民更加唔like!

雷莊兒父母到場支持,富爸爸更火速被起底!
雷莊兒仲有個細妹讀緊書。

當日試戴后冠,已表示覺得選港姐的泳衣唔夠性感,觀乎佢做model時著的性感泳衣,中間大deep V落到肚臍,果然夠晒出位!

雖然有把長直髮,亦未能令雷莊兒加添少女嫵媚,難怪被網民譏諷似賓妹!

同牙醫男友的親密照亦被曝光!覺得好失望

被彈到爆,雷莊兒就忍唔住在IG開live用英語還擊,「冇期望所有人都會喜歡自己,知好多人唔支持我拎冠軍,會尊重唔同人意見,但覺得好失望,啲人挑起罵戰,不過我唔會理呢啲批評,我會變得堅強!我唔識睇中文,亦唔會花時間去翻譯每一個中文留言!」頭上多咗個光環,雷莊兒似乎比網民更寸!

雷莊兒直播反擊網民,更否認父親富貴,寸咀話:「我爸爸,我不知你們會這樣想,因為有些人竟相信傳媒報道,可能他們不夠聰明!」

網民咁激動,全因今屆港姐選舉有別以往家庭觀眾有份投票方式,全交由10位星級評判話晒事。猶記12年港姐選舉為紀念40周年,首次玩全民投票,卻因為電腦系統故障,最後令網民票選的大熱朱千雪大熱倒灶,由評判選出的張名雅奪冠,一樣搞到滿城風雨!

相關文章:

唔撞款 雲石紋文青手錶!意大利個性品牌 Harry Williams

跟娜姐入手 Marc Jacobs 最新迷你袋 平過官網2成!

陳潔玲揭電視城渣男 坤哥最大嫌疑

關注我們Facebook專頁
    相關新聞
      更多瀏覽