【100 - 39.3 = ?】王喜搭的士 不滿司機找少7毫子
2017年08月05日07:00

王喜喺Facebook上載咗一張的士收費單,同三張20元鈔票,留言話:「香港的士司機的算術 100 - 39.3 = 60」似乎話緊的士司機找贖時少咗7毫子。

網民睇完之後反應都好大,有人反問王喜點解唔即時要求司機找錢,反而要網上公審:「身為公衆人物,為幾毫子放人上網公審人地就有點兒失身份組,感覺上好小家囉。」仲有疑似的士司機行家話:「以後見到王生,畀佢上車前要睇清楚有冇散銀找,如果冇,就開車走,支$39.3留畀下一位做啦。」

有人反,就當然有人撐喇:「要找七毫就係乞丐,唔找嗰個又係乜呢?」、「$500又話冇得找,幾毫又話費事摷,叫你裝八達通又話麻煩!」、「根本做壞規矩,司機未問人要唔要找就自把自為貪多少少,唔想次次找毫子咁煩咪四捨五入都冇咁嬲。」亦有人話自己好好彩,遇到啲夠晒誠實嘅司機。

有傳媒打過畀王喜,王喜就話唔回應,至於大家討論咗咁耐,都似乎未有結論!

關注我們Facebook專頁
    相關新聞
      更多瀏覽