逢人電濫 收兵 劉佩玥一晚撻兩仔
2017年07月20日21:31

27歲的劉佩玥(Moon)於2013年選港姐獲季軍入行,逢人電而且 收兵 多過食飯,為人主動唔怕蝕底,合作過的男藝人好易中招,緋聞男友周志文、伍允龍與張彥博統統已過時。日前新仔打孖上場,上半場劉佩玥先約保釣烈士陳毓祥之子、ViuTV主播陳安立(Brian)去數碼港睇戲,之後下半場就落旺角同港男翟威廉食晚飯然後直落返家,一晚連撻兩仔,劉佩玥戰鬥力相當強!

緋聞男友不斷 最叻扮純真 收兵

劉佩玥入行4年,緋聞男友多多,而且每次傳緋聞後男方都keep住做觀音兵,傳吓緋聞增加人氣之餘,得閒又可以用來攝時間。劉佩玥早前被指與大孖周志文翻撻而狠飛長期不在港的伍允龍,之後又被影到拍新劇時狂向黃子恆拋眉弄眼,看來收兵已成為佢日常生活重要的一環。能夠令男士們拜倒其裙下,劉佩玥自有其吸引之處,據知佢慣性對住男藝人就嗲爆,成日扮天真無邪,人哋講咩佢都話:『真係㗎!』啲男人信十足覺得佢好純。

劉佩玥去年開始不時與張彥博單對單Jam歌,每次夾歌劉佩玥都瞇晒眼甚為陶醉,被指唱出火花。
去年10月被影到與何廣沛撐枱腳,出席活動見記者時澄清與對方只是好朋友,不過就大讚何廣沛又細心又懂得照顧別人。
去年因合演《城寨英雄》而傳緋聞,劉佩玥不避嫌出席伍允龍朋友間的叙會,後來因伍長期出埠工作,劉佩玥芳心寂寞再撻周志文棄伍允龍。

日前本刊捕獲劉佩玥與一名身高6呎的高大型男步出數碼港戲院,望清楚型男原來是保釣烈士陳毓祥之子陳安立(Brian),Brian是ViuTV主播,又曾與黃心美傳緋聞,近月曝光率增多。眾所周知數碼港是明星偷情拍拖聖地,二人本來前後腳行煞有介事,後來見天已黑四圍又少人才愈行愈埋,仍掛住P牌的劉佩玥最後更載Brian到旺角,送佢到麥花臣球場打籃球。

上周三(12日)晚上7時許,劉佩玥與陳安立睇完戲步出有偷情聖地之稱的數碼港戲院時,二人隔開成個身位行,有啲嘢喎!

劉佩玥的白色寶馬變成媾仔戰車,陳安立上車前好謹慎四圍望,由劉佩玥送他過海去旺角麥花臣球場。ViuTV小鮮肉 父為保釣烈士陳毓祥

食開花心蘿蔔的劉佩玥,今次終於識食喇!終於交番個有質素男仔,29歲的Brian陳安立身高6呎1寸,有樣有才華,屬健康陽光型男,擅長游水及各種球類活動,入水能游出水能跳。六年前大學畢業後參加nowTV觀星台的選秀節目而入行,現為ViuTV力捧主播之一。

劉佩玥與陳安立今年三月在公開活動上才認識,話咁快就行得咁埋。
Brian父親是保釣烈士陳毓祥,96年跳入海宣示主權不幸遇溺離世,當時Brian只有8歲。
早前Brian被影到與黃心美拖狗落街散步,又一齊返女方屋企而傳出緋聞,事後二人齊聲否認拍拖。
當晚Brian由劉佩玥送到旺角麥花臣球場後,即落場打籃球大展身手,期間更衣時露出一大排朱古力。

補定妝趕下場

陳安立下車後,劉佩玥駛到旺角朗豪坊停車場,泊好車後,佢在車廂內拿出化妝品不停補妝,之後獨自在商場閒逛,一小時後接了個電話才移玉步到戲院樓層,原來翟威廉已企定定等娘娘!

劉佩玥靠樣搵食,見仔前梗係要執吓個樣,在車廂內又畫眼線又補粉,不容有失。
露腰上衣加熱褲騷長腿的劉佩玥一副戰鬥格,過馬路時翟威廉伸手扶實,劉完全冇抗拒。
在旺角放低陳安立,再去會合天生愛做兵的翟威廉,劉佩玥真係識分配時間。夜訪砵蘭街窩居

二人見面即雞啄唔斷,行出鬧市每逢過馬路,翟威廉都扶實劉佩玥,在樓上餐廳食過晚飯後,再熟練地行去翟威廉近月在砵蘭街租住的窩居單位。翟威廉最近以月租萬四蚊租了旺角砵蘭街一個三百呎單位,招呼藝員好友齊jam歌做直播,呢日劉佩玥食飽飽亦跟上樓,不過當晚並沒有直播,亦未見有其他好友到訪。

情敵兼波友

劉佩玥一晚約會的兩位男主角陳安立與翟威廉,原來都是「Hero」藝人籃球隊的成員,知情者透露:「最近Moon成日話要練好啲歌做直播,而William就成立咗『Happy Live』藝人合唱隊,不過Moon唔理有冇其他人,成日單獨上去jam歌。William當然冇所謂,佢對個個女仔都好好,就算明知畀人當係觀音兵都唔介意。」當日劉佩玥身穿露腰上衣加牛仔熱褲,以蛇腰長腿做餌,再加心心電眼姣功,咁重火力,一於有殺錯冇放過。

劉佩玥近月不時在網上自彈自唱做直播,仲孖住翟威廉等人組成合唱隊喺Big Big Channel搶hit rate,實質係以歌會仔。

全文完

相關文章:

浸住溫泉睇富士山!5大性價比極高 東京住宿 推介

千語BB 箍煲成功 林峯御准入住新愛巢

老竇做教育局高官 何浩文 屈住荃灣工廈

關注我們Facebook專頁
    相關新聞
      更多瀏覽