【5個月喇】賴慰玲生日宣佈未婚懷孕:夢想是當一個母親
2017年07月09日03:08

星期六喺賴慰玲31歲生日,估唔到呢日,佢仲宣佈多個好消息,就係已經有咗BB近五個月!

賴慰玲喺Instagram貼咗張佢同拍拖五年嘅舞台劇工作者男友梁子峰喺雪山影嘅相,留言話:「TheBiggestBDGift,今年最大最大的生日禮物,是我肚中有了一個小生命。除了演員,我的夢想就是當一個母親,是這個時候了。我們牽手5年,我們的寶寶快5個月,我們帶着滿滿的感動和祝福,期待着寶寶的來臨,來噴射式恭喜我啦!」

到晚上佢就再貼出同一班好姊妹,好似有何雁詩、陳瀅、糖妹、陳嘉寶等摸住佢個肚嘅相,留言話:「大家真係好噴射式嘅祝福,多謝呢班契媽媽一直幫我保守秘密,但係其實佢哋知道嘅時候,興奮到喊咗,有一個喊左10分鐘,我坐係隔離束手無策!」

至於好友陳嘉寶接受傳媒訪問時話,知道後每次見到賴慰玲都會好肉緊,不過自己就唔想回應太多:「佢聽日會有活動,等佢親自同大家分享啦。」而田蕊妮就話自己之前已經知:「佢一路都夢想做媽咪,佢終於夢想成真!」

孫慧雪亦有恭喜賴慰玲,佢喺Instagram話:「生日快樂,恭喜你做人媽媽啦!真替你開心,估唔到我哋一齊做媽媽。」不過賴慰玲竟然「錯重點」,回應話:「點解揀張影得唔靚嘅相!」

其實早喺今年三月,賴慰玲接受網媒訪問時話自己日日都想結婚:「等一個衝動,衝動來到就自然發生!」依家連B都有埋,似乎係一個好時機喎!

關注我們Facebook專頁
    相關新聞
      更多瀏覽