禁老公插手教仔 李嘉欣 特訓小鐵人
2017年07月05日18:38

47歲的大美人 李嘉欣 ,早年曾雪定卵子想追多個女,不過近年已打消念頭,寧願把全副心機放在寶貝仔許建彤(Jayden Max)身上。轉眼Jayden已6歲,但為怕慈父多敗兒,嘉欣嚴禁老公許晉亨插手教仔,做到一黨專政令兒子乖乖聽話。不過嘉欣並非一味做變態虎媽,除了學術上的發展,佢亦由小讓Jayden接觸多項運動,鍛鍊出強健的體魄,同爸爸許晉亨走唔同路線!有靚媽媽嘉欣身體力行陪着佢走,日前幼稚園畢業的Jayden,兩個月後就會成為爺爺許世勳小學弟,入讀男拔附小升呢做小學生。

李嘉欣 為子鋪路入男拔

圈中不少星爸星媽,都會為子女報讀學費高昂的國際學校,貪其功課、考試唔多又夠自由。但 李嘉欣 反其道而行,一開始就心儀傳統學校,為兒子報讀拔萃男書院附屬小學。有指爺爺許世勳與伯父都是男拔附小舊生,Jayden靠人事關係入讀零難度,不過嘉欣唔想兒子覺得自己高人一等有特權,故循正常途徑考入學試,最後當然順利被取錄!

據知嘉欣由Jayden仲係BB開始佢已經揸得好正,從來唔俾老公插手教仔,因為爸爸有時會好放鬆變咗做壞規矩,嘉欣獎罰分明,唔會一味寵仔。上年Jayden開始要報學校,嘉欣當然知道只要老爺出句聲,根本唔需要考都入到男拔,但佢堅持自己入紙,同時狂操Jayden喺體藝上的發展,因為男拔收生唔一定只睇成績,小朋友喺運動或藝術上表現出色都會加分!

李嘉欣 拒絕養港童

Jayden雖然身為船王後人許世勳的內孫,他日有機會繼承家族過百萬億計的財產,但嘉欣唔想讓兒子覺得自己贏在起跑線,所以自Jayden出世後,一直努力鑽研教育小朋友的方法,寧願做嚴母都唔想囝囝變港童。佢希望Jayden有強健的體格,由細就鼓勵佢在運動上多作嘗試,包括游水、體操、冰上曲棍球、高爾夫球同攀石等等,現時Jayden四肢與肌肉特別發達,亦長得較同齡小朋友高,病痛亦特別少!嘉欣見到Jayden文武雙全而且對人熱情有禮,就知呢幾年的心血沒有白費。

貼地遊公園

不過嚴母又唔代表好專制,早前嘉欣一身便裝素顏出席Jayden所讀的幼稚園家長日,離開時更順應囝囝要求到附近公園遊樂場玩,見佢與一般家長無異,放學後不停追問當日的學校生活如何,與囝囝邊行邊傾好開心。去到遊樂場又唔怕污糟,放手俾Jayden周圍摸周圍玩,仲同其他同校家長打牙骹交換育兒心得,絕無半點架子,睇得出嘉欣完全融入做全職媽媽呢個身份。

陪太子畢業

另一日,嘉欣與許晉亨現身灣仔新伊館出席Jayden畢業禮,離開時嘉欣更忍唔住啜爆囝囝!而身穿古裝表演服的Jayden全程拖實媽咪,眼仔碌碌完全唔怕醜。

全文完

相關文章:

「阿甘鞋」輕量化演變 Cortez flyknit 新品到着

回應與洗米華關係 松岡李那 唔識中文:「拍拖??」

黃偉文林奕匡聯手 〈 霸氣情歌 〉賀陳柏宇新婚!

關注我們Facebook專頁
    相關新聞
      更多瀏覽