使凸贍養費返港撲水 陳法拉 搵舊愛王浩信幫拖
2017年06月29日15:38

陳法拉 和Neway大少薛世恆離婚後,為過新生活,拎住一筆贍養費,14年隻身到紐約修讀四年碩士課程,早前更被爆有個法籍新歡!不過以往過住豪門少奶生活的法拉,要支付高昂生活費、學費,又要照顧已退休父母,贍養費話咁快搣完,惟有自力更生密密返港接job!一邊撲水之餘,法拉又要為交功課執導微電影,低成本又要有卡士,故不惜搵來昔日未紅時拍過拖、現今已是無綫數一數二小生的王浩信幫拖!

陳法拉 離婚後做全職學生

法拉與Neway大少薛世恆的戀情於07年曝光,女方一直唔認愛,直至11年有傳二人於美國秘婚,曾高調繑手拍拖出席活動,可惜最後於14年離婚收場。法拉放棄如日方中的演藝事業,到紐約茱莉亞演藝學院(The Juilliard School)進修四年演藝課程,導師仲係美國名演員及導演Kevin Spacey!學費之高昂可想而知。

返港撲水

今年暑假未正式開始,陳法拉返港短短一星期,已經出了三個event,出席完時裝品牌活動後,隨即又到影樓影相做訪問,連日不停為配音的電影做宣傳,返港前更返家鄉四川拍攝節目,工作排得滿滿,幾乎忙過做全職藝人的時候,連日開工的法拉難免雙眼冇神兼現疲態。

放下原則密密做

法拉身為昔日的無綫當家花旦,接job向來謹慎,性感賣肉no way,不過近日出席活動時罕有地親民,另外更不惜露肉拍纖體廣告,唔再嫌錢腥啦喎!

搵舊愛幫拖

為爭取時間搵銀,法拉連功課也得喺香港完成,佢透露首次執導拍攝微電影,劇本也在飛機上寫,佢話:「第一次拍電影乜都自己搞,今次只係小本製作,只會預五位數字成本,今次拍咗好多膊頭,會搵大家識嘅人演出,佢哋都係義演。」其中一人就係人氣勁又有演技的前前度王浩信!近日忙拍《溏心風暴3》又要為孭飛新劇《踩過界》谷收視的王浩信,對於識於微時的前度法拉,直言大家一直保持聯絡,開到聲可以的話都會幫拖!

女友變老闆娘

據知王浩信和陳法拉入行前已相識,二人同於美國讀書,在華人社交圈結識後拍拖,後來王浩信因家中生意失敗未能完成學業就先返港,並在一次卡拉ok中被唱片公司Neway發掘並簽做歌手。知情者稱王浩信知法拉好想入行又鍾意唱歌,所以喺一次公司卡拉OK聚會,將法拉介紹俾自己老闆薛世恆識。

點知薛大少冇簽法拉做歌手,但就追咗對方做自己女朋友囉!雖然法拉由女友變咗做自己老闆娘,不過大家都年輕,王浩信同對方一直保持唔錯關係。其實王浩信當年知名度好一般,同Neway大少的確冇得比,所以法拉… 你懂的。法拉和王浩信兩小無猜的一段情從此被冰封,而法拉和薛世恆由拍拖、秘婚都冚到實一實,直至離婚都繼續低調。

太太呷醋

王浩信大方願意拔刀相助前度法拉,之不過太太陳自瑤(YoYo)卻不是味兒,其實佢之前已經埋怨老公冇時間照顧家庭,近日又不時在IG出文,表面話發放正能量,但字裏行間卻負能量滿滿,係女人都介意老公同前度有任何關連,係女人就會明點解YoYo呷醋囉﹗

全文完

相關文章:

《賭城群英會》 文凱玲 性感邪花vs四眼宅女

2017 港姐 複選精華

《 流行經典 》MLTR驚喜現身 蕭正楠孖曹永廉唱〈當年情〉

關注我們Facebook專頁
    相關新聞
      更多瀏覽