【樂壇童工】曹震豪一人分飾十把聲 坤哥:點解唔扮我呀
2017年06月17日07:00

林敏驄最近開作品展,雖然一波三折,但就有唔少好友,好似鄭中基、杜麗莎、古巨基同薛凱琪等等幫手。

不過當晚仲有個「小朋友」著校服上台同佢唱歌,原來呢個就係曹震豪(Wallis),林敏驄仲講笑咁話:「請咗個童工!」自始曹震豪仲多個咗個名叫:「樂壇童工」!

呢日呢位樂壇童工仲喺網上貼咗條片,見佢係片入面一人分飾十把聲,唱盡古巨基、謝霆鋒、張智成、曹格、郭富城、王力宏、蕭敬騰、蘇打綠、林子祥,同埋佢自己嘅歌!

曹震豪話:「自己其實成個idea係岑珈其俾㗎,本身淨係諗住學人玩下扮聲自娛下,入面全部都係我鍾意嘅歌手嚟,你哋覺得我扮邊個把聲最似呀?」唔少網民讚佢扮得好似:「你一定係扮曹格最似!」、「唱乜我都鍾意,我連你都鍾意!」、「扮曹震豪最似」,連吳業坤都抽水話:「點解唔扮我呀!」

關注我們Facebook專頁
    相關新聞
      更多瀏覽