巡視酒樓業務 陳錦鴻冧客拉生意
2017年06月16日14:17
錦鴻同老婆杜雯惠原本係嚟酒家開餐,不過,緊張生意,忍唔住巡視下業務。

【星島日報報道】陳錦鴻10年前拍落嘅劇集《蘭花刼》,無線最近就喺倉底挖返出嚟,仲擺黃金時段播放,舊劇得以重見天日,身為男主角嘅錦鴻,義無反顧返娘家幫手做宣傳,認真唔話得。

雖然「港視」嗰邊開台唔成,錦鴻一直「停產」冇劇拍,但佢並唔係完全冇野撈。早年,佢已經喺尖沙咀開咗間潮州酒家,近一、兩年仲喺黃埔同廣州開多兩間,喺飲食界大展拳腳。

早排,錦鴻喺佢尖沙咀嗰間酒家出現,同埋老婆杜雯惠去返自己地頭開餐,睇得出佢都好緊張啲生意,順便四圍行巡視業務。期間,有啲熱情客人見到錦鴻都好驚喜,猛同佢打招呼say hello,而佢亦都好識做,笑到四萬咁口走埋去冧客,仲聽到佢猛咁叫人多多幫襯,認真落力拉生意。

關注我們Facebook專頁
    相關新聞
      更多瀏覽