【模範家庭】哈七賣萌學芭蕾舞 布魯克林差啲「作反」
2017年06月12日07:00

碧咸(David Beckham)同碧咸嫂維多莉亞以及幾個仔女,可以話係圈中模範家庭,見佢哋經常成家人出去玩,IG亦不時貼出自己同屋企人嘅相,非常溫馨!

好似呢日咁,碧咸嫂就上載咗哈七(Harper)學芭蕾舞嘅相,見佢着住舞鞋,雙腳做外八字,非常專業,似乎學得有板有眼!呢張相更得到近六十萬個like,隨時多過晒碧咸同維多莉亞!據講,哈七自從前年睇完《胡桃夾子》後,就愛上芭蕾舞,唔經唔覺已經學咗成年喇。

至於大仔布魯克林(Brooklyn)就疑似「作反」,碧咸日前接受James Corden訪問時,大爆布魯克林試圖暪住碧咸去紋身。

話說布魯克林應承過碧咸,第一次紋身一定要同老竇一齊去,點知佢今年生日前同女友去巴黎度假,就偷偷地去咗當地紋身店,好彩同行老友即時打畀碧咸報寸,係碧咸「友善」提醒下,最後布魯克林都係冇紋到。

關注我們Facebook專頁
    相關新聞
      更多瀏覽