【運動世家】衛詩雅恨喺NBA被求婚:應唔應承到時先算
2017年06月11日07:00

熱愛運動嘅衛詩雅呢日同百球迷齊齊睇NBA總決賽Game 4,又同球隊吉祥物大派禮物,吉祥物開心到同佢鍚鍚添!

詩雅坦言自己一直都好想可以去現場睇一次NBA籃球比賽,見過網上片段有些觀眾於比賽中場求婚,覺得浪漫:「一定會好驚喜,不過應唔應承就要到時先算啦,哈哈。」被問到係咪做運動嘅男生特別吸引?詩雅自爆第一個暗戀對象,正正係校內籃球隊隊員:「得閒咪去睇佢練波!」

不過,唔講唔知,原來詩雅全家都係運動高手,佢泳術了得亦做過救生員,爸爸則愛好潛水:「今朝我出門口睇波佢就出去潛水,家姐係籃球隊隊員,細佬就係十項全能,好叻仔。」

問佢識唔識打籃球?詩雅話:「唔係好識打,小學我有打過女子籃球隊,當時我係做後備,但後來我由陸路轉去水路。」

關注我們Facebook專頁
    相關新聞
      更多瀏覽