《蘭花刼》收視慘淡 盤點無綫6大低收視劇集
2017年06月09日19:31

TVB播放中的十年前倉底劇《蘭花刼》雖然有三大花旦蘇玉華、田蕊妮同胡定欣主演,但畫面由4K一下跌番落標清,內容嚴肅唔討好,師奶唔受樂,年輕人又唔睇。劇集播出至今視收奇差,平均收視得18.1點,成功登上TVB最低收視劇集頭十位!不過低處未算低,其實近年都有唔少 劇集 可以同《蘭花刼》(的低收視) 匹敵,你又覺得邊套最唔掂呢?

《蘭花刼》

十年倉底劇《蘭花刼》有三大花旦蘇玉華、田蕊妮同胡定欣坐陣,雖然三大花旦完美凍齡,青春常駐,但畫面由《不懂撒嬌的女人》的4K一下子跌到標清,內容仲要講姊妹情仇加冤獄,劇情冷門,師奶耍手兼擰頭,熄電視都唔睇你。劇集播出至今口碑麻麻,平均收視得18.1點,大家都想快啲睇《賭城群英會》,或者不如睇ViuTV啦?

《巾幗梟雄之諜血長天》

《巾幗梟雄之諜血長天》雖然有視帝祥黎耀祥擔正,但劇集一早喺myTV SUPER收費電視播完,之後先喺TVB翻播,想睇的觀眾一早睇哂。之前《巾幗》系列叫好叫座,鄧萃雯的精湛演出功不可沒,但今次換上胡杏兒,令觀眾追看意欲大減。而且翡翠台版本係刪除了強暴、雞姦等話題片段,所以得20點都係意料中事。

《我瞞結婚了》

較近期的《我瞞結婚了》由洪永城、黃翠如及黃浩然主演,劇集以瞞婚做引子,講述兩男爭一女的故事,大家都好期待翠如BB情歸何處。可惜兩位主角洪永城同翠如BB演技唔多討好,中後期劇情開始派膠,例如用汽球帶人飛越鯉魚門、生Cancer等等。而結局為免順得哥時失嫂意,仲要夾硬加個國產翠如出嚟,夾硬拍成大團圓結局,收視自然慘不忍睹。

《金枝慾孽貳》

由視后鄧萃雯擔正一樣滑鐵盧的《金枝慾孽貳》,陣容星光熠熠,本以為可以延續《金枝慾孽》的聲勢。誰不知反高潮,低收20.6點。由於劇集係幕後黃金組合戚其義同周旭明離巢後的作品,而部份演員同TVB的合約不明朗,所以播前宣傳冷落。雯女更炮轟劇集零劇本、「飛紙仔」,安排散亂,令製作質素下降。

《來自喵喵星的妳》

由《鬼同你OT》原班人馬炮製,集陳豪及兩大影后田蕊妮、胡定欣等多位當紅演員,理應輕易取得高收視。可惜事與願違,劇集只得20.8點收視。全套劇最大問題就係田蕊妮臨近四十扮貓噁心造作,而且劇程唔連貫,唔知講乜,觀眾梗係睇都唔睇啦。

《實習天使》

除咗《我瞞結婚了》,都係由洪永城擔正的《實習天使》,可以話係近年膠劇之最。劇集被指出情節謬誤多多,有違常理,同現實中護士的工作大相逕庭,而且奇怪劇情浪接浪!先係有議員hehe情節,又有洪永城屋企燒衣紙的恐怖場面,再由護士化為神探跟蹤綁架匪徒,仲有香香夾硬除衫情節!膠味甚濃,最終只得22點收視。

全文完

相關文章:

陳柏宇 10首精選動人情歌

會展拉闊騷 側田感觸落淚 Gin Lee驚豔晒Deep V

陸漢洋承諾幾肥都娶 苟芸慧 甜晒婚戒

關注我們Facebook專頁
    相關新聞
      更多瀏覽