認受感情困擾 唐詩詠 :短期內解決
2017年05月15日19:34

無綫首套4K劇《不懂撒嬌的女人》正在熱播中,除了王浩信飾演的暖男「Saving哥」冧爆觀眾外, 唐詩詠 的演出亦十分亮眼!今日劇集眾演員到將軍澳為劇集宣傳,近日詩詠盛傳與男友洪永城感情生變,佢早前表示需要多啲時間,仲話適當時候會同洪永城一齊交代。今日詩詠再被問及感情事,佢就承認係受感情問題困擾,仲話自己呢方面一向處理得唔好,希望短期內會盡快解決!

王浩信爆結局勁催淚

今日《不懂撒嬌》一眾演包括宣萱、林文龍、王浩信、 唐詩詠 、高海寧及袁文傑等,到將軍澳為劇集宣傳,出席演員率先預告每對男女往後的愛情發展,又派喜餅俾現場觀眾,分享甜蜜喜悅!其中「Saving哥」透露劇集結局會相當催淚,佢自己睇咗一分鐘就喊出嚟!

Sweet爆螢幕情侶 王浩信 唐詩詠

王浩信及詩詠呢一對喺劇入面真係sweet到爆,有望成為另一對經典螢幕情侶,難怪王浩信都話有信心喺台慶冧莊攞「螢幕情侶」獎!

高Ling今日依然索爆!

仲有呢期好紅的「游生」袁文傑!

唐詩詠 :需要時間同空間

今日詩詠再被問到與洪永城的感情事,佢首先向大家講聲唔好意思,因為自己唔太識得處理感情事,令到大家有誤會。而感情係兩個人的事,需要尊重雙方,同時需要時間處理,所以希望大家俾空間佢哋。另外詩詠直言唔想感情事與劇集拉上關係,因為劇集仍在宣傳中,唔想外界認為佢係借感情事博宣傳。

承認受感情困擾

詩詠講到咁隱晦,咁佢同洪永城係咪處於冷靜期?佢就只係話兩人依家都好忙,所以之後先再交代,需要多啲時間,正尋求一個大家都舒服的解決方式。外界估計佢一係結婚一係分手?詩詠回答:「唔講啦,我寧願一次過講。」但佢就點頭承認呢件事令佢好困擾,並希望短期內可以解決。

全文完

相關文章:

新《 學是學非 》 咸豐中女 VS 開心少女

《不懂撒嬌》暖男王浩信 六大經典角色逐個睇

盛傳跟洪永城分手 唐詩詠含淚回應

關注我們Facebook專頁
    相關新聞
      更多瀏覽