【首度合作】「雙龍會」成真!史泰龍同成龍將拍動作片
2017年05月13日07:00

荷里活動作巨星史泰龍(Sylvester Stallone)早前同黃曉明拍完新片《逃亡大計2》(Escape Plan 2: Hades)後,呢日有報道指,成龍亦將與史泰龍首度合作拍新片,今次仲係呢兩位巨星首次正式喺銀幕上合作拍長片!

據美國電影網站The Hollywood Reporter報道,喺多間中資電影公司拉攏兼斥資8000萬美元下,兩人將會喺新片《Ex-Baghdad》「過招」,電影仲計劃揾《極速激戰》導演史葛禾夫(Scott Waugh)執導,而《摩納哥王妃》編劇Arash Amel將撰寫劇本!

報道話,電影講述內地投資伊拉克嘅摩蘇爾煉油廠遇襲,擔任私人保安公司負責人嘅成龍參與救援行動,期間佢知道襲擊者真正計畫係盜取燃油去賺錢,於是佢搵嚟前海軍史泰龍聯手破敵!

其實早喺《第一滴血》續集,史泰龍已經想搵成龍飾演毒犯,不過有指成龍擔心影響形象而唔成事,去到97年,佢哋就一齊客串《星光龍門陣》,喺開場戲中一齊現身!

關注我們Facebook專頁
    相關新聞
      更多瀏覽