【有新歌!】許靖韻緊張拍MV 為型專程拎粉紅結他
2017年04月28日07:00

許靖韻(Angela)今年第一首派台歌《Shut Up》就揀咗Pop Rock風格,佢話Band Sound一直都係佢鍾意嘅音樂,之前礙於同個人形象不襯,所以以前好少涉獵,今次終於講服公司畀佢試!

Angela話《Shut Up》呢首歌係送畀自己,亦係自己身為90後嘅一啲睇法︰「成年人經常對年輕人嘅前途同抉擇有好多意見,往往想按佢哋嘅指示去做,走佢哋認為成功嘅嘅路。《Shut Up》就係想佢哋靜一靜,等我哋憑自己嘅思維,走出一條屬於自己嘅道路。」

至於今次MV,對結他未算精湛嘅Angela,話自己拍得好開心,但就有少少緊張:「我練咗好一段日子,先敢喺大家面前演出,雖然唔係唱Live,但因為作曲嘅Goro都會客串飾演結他手,佢本身係專業樂手,知道要企佢隔籬彈,有種講唔出嘅緊張,好似正式出Show咁,我緊張咗好幾日!」

Angela仲話自己為咗出鏡時更搶眼,專程去搵支粉紅色結他:「一直以來,攞住粉紅色結他喺台上表演,係我其中一個小小嘅心願,今次終於如願以償。」

關注我們Facebook專頁
    相關新聞
      更多瀏覽