「波係圓嘅」呢句說話，相信大家都仲好記得，講出呢句「金句」嘅，就係2008年病逝嘅前資深體育新聞主播伍晃榮。而由伍晃榮一手帶入行、人稱「體育王子」嘅前無綫電視新聞部體育組首席記者伍家謙，就曾經講過伍晃榮將佢當成「半邊仔」。

呢日伍家謙喺facebook悼念恩師，話自己整理舊照片時，記起佢同伍晃榮嘅一段往事：「那些年 - 約十三、四年前吧，才畢業不久，初出茅廬，工作大意粗疏；報道球賽，竟把勝負對調，A贏B寫成B贏A，屬極嚴重失誤。新聞播出街後，枱頭電話響過不停：朋友、行家、觀眾，接連來電指犯下大錯。自己邊急忙往剪片房改正，另一方面則嚇至雙腳發軟，暗忖：死喇呢次，衰鑊咁甘嘅。」

伍家謙話因為當日伍晃榮放假，自己就以行刑嘅心情等待發落：「平常犯些小錯都鏟到我上天花板，何況呢次咁大單？」不過，最後伍晃榮聽完佢講番件事後，只係「嗯」咗一句，就走入『老細』間房：「這樣一來，我仲驚：即係點呢？死喇死喇死喇我……不一會，他走出房間了。劈頭第一句：『你介唔介意畀你爸爸個電話號碼我呀？』

俾完電話號碼，伍家謙幾乎想喊出嚟，但冇耐就收到爸爸電話：「你阿頭真係好好呀！你阿頭真係好好呀！佢打畀我，話知道你一定好驚，所以實會搵屋企人訴苦......佢話叫你唔駛驚呀，仲叫埋我唔駛擔心你。佢同我講：我請得佢返嚟，一定同你睇住佢㗎！」、「之後陸續有同事跟我說：喂！阿盲頭先親自入老細房幫你解畫喎，你巴閉呀你！」

伍家謙話，相信講到呢度，就解釋到點解佢咁敬重伍晃榮：「這種，叫Tough Love；年少輕狂，總有不服氣的時候，但沒多久就摸熟他的脾性，懂得珍惜被他罵的時候。幾年之後跟他打邊爐喝啤酒，舊事重提，他哈哈大笑：『唔係咁你邊識驚呀!』」