【鄭俊弘與何雁詩】麥明詩玩抽水 姜文杰疑似為妹出頭:好一對狗男女
2017年04月08日07:00

鄭俊弘日前被爆背前未婚妻Beebs暗撻何雁詩,本來兩人一直唔認愛,但星期四晚,何雁詩搭飛機飛杭州前,阿Fred就突然現身,仲同何雁詩手拖手見記者兼認愛,一次過呃晒全世界,包括佢老闆何哲圖,同幫佢做獨家漂白專訪嘅無綫!

雖然阿Fred就話自己係分咗手先同何雁詩一齊,又堅稱兩段感情係冇重疊,不過有指,何雁詩之前都試過以第三者身份介入其他人感情,所以點講都冇人信,喺機場見完記者後,更畀網民鬧到一地負皮。

何雁詩見狀,就喺fb留言同自己打氣,佢話:「我一向對感情認真,一向一心一意,更加不會在知情內成為第三者。今天遇到一個我很喜歡的人,因為他和我一樣,而我愛我自己,希望事情可以告一段落,我相信我的男人會好好對待我們的感情。其他難聽的說話可免了,我可能無知,但我光明正大。」

至於其他人呢?食花生嘅食花生,抽水嘅就繼續抽水!好似麥明詩喺社交網出咗個po,表面上係話俾大家聽,佢星期六同鄭俊弘出活動,實質上又係抽水:「大家要嚟支持我呀,到時我會唱歌!同TVB首席男歌手同台,真係好大壓力,唱功必相形見絀,唯有誠意搭救!」之後仲抽埋路過嘅胡鴻鈞:「@hubertwu 定係你係首席?」

曾經同阿Fred係好朋友,喺加拿大讀書時已經認識嘅姜文杰,有指當年佢介紹自己個妹姜麗文(Lesley)畀阿Fred認識,兩人好快仲拍拖,但自從阿Fred喺《星夢傳奇》彈起後就飛起Lesley,仲有指Lesley試過好激動咁同閨密講:「Fred紅咗先飛我!」

姜文杰睇到阿Fred近期發生咗啲咁嘅事,疑似想為妹妹出口氣,呢日佢喺instagram貼咗一張周星馳同吳孟達喺《整蠱專家》入面話:「好,一對狗男女。」嘅截圖,仲留咗啲hashtag:「#熱烈地彈琴熱烈地唱#DKLMCFH#花生」雖然冇開名,但明眼人一睇就知串緊邊個!

關注我們Facebook專頁
    相關新聞
      更多瀏覽