上節目發揮港女本色 馮盈盈大爆為爸爸選港姐
2017年03月28日17:05

由森美、火火及劉翁主持的商業電台節目《公子會》,繼上星期請來森美在《千奇百趣特工隊》的朱智賢後,日前就到另一位索特務、2016年港姐冠軍 馮盈盈 (Crystal) 做嘉賓!Crystal在節目中繼續發揮「港女」本色,展露真性情無所不談,除了透露自己去年選港姐其實係為咗爸爸,又大爆自己的戀愛史,夠癲夠放,不愧為「最貼地港姐」!

選港姐 為爸爸

節目初森美問Crystal當初點解會選港姐,原來Crystal第一次聽到「不如你去選港姐啦」呢句說話,係由佢現任男朋友Martin講的!唔通係Martin覺得佢實在太靚,於是建議佢去選港姐?Crystal就話選港姐的主因係為咗爸爸!因為自己一直想做一件出人頭地的事,希望令爸爸以女兒為榮、因女兒而驕傲,而佢同男朋友討論呢件事時,對方就建議佢不如選港姐!

森美大讚貼地

Crystal本來打算大學畢業後做個營養師,待工作穩定後做一啲生意,雖然未至於好出色,不過起碼算係個成功的社會人。但老老實實,以上事情都唔係一時三刻可以做到,所以Crystal幽幽地講出:「我覺得太耐啦!」於是就聽從男友意見去選港姐!(仲做埋冠軍㖭)唔少港姐被問到參選原因時,都會講咩想「挑戰自己」、「推廣香港文化」等比較公式化的答案,反而Crystal開門見山,選美就係為咗出人頭地,森美都不禁讚佢夠貼地!

港女唔等於冇禮貌

森美稱讚Crystal為人爽朗又不拘小節,在《千奇百趣》中常常展露真性情,亦勇於表達自己的真實想法,與時下年青人無異,係個百分之百的「真港女」!但就大爆Crystal私下卻出奇地有禮貌,事緣在節目未開拍前,Crystal有一日在化妝間走到森美面前:「我係馮盈盈啊,森美我嚟緊會喺你個節目度做,請你多多指教。」令佢十分訝異!

Crystal就指出呢樣係基於禮貌,因為人人都尊稱森美為大哥,所以認為事前一定要打個招呼。雖然平時形象咁港女,不過禮儀方面就做到足,叻女!

港女爭住埋單

之後Crystal開始談及現任男朋友Martin,佢自爆拍拖初期,每次出街食飯都幾乎係自己埋單!點解做醫生都要女朋友請呢?原來Crystal跟從爸爸的教導,唔希望因為對方係醫生就理所當然要出晒錢,所以經常趁男友去洗手間時就埋單,唔想感覺上係咩都要依賴對方。

不過某次一班朋友食飯時,Crystal一如以往負責埋單,朋友們知道後覺得好奇怪,點解反而係由女朋友埋單請番轉頭?搞到Martin非常唔開心,事後認真地鬧咗Crystal一餐!

18歲的初戀

身為美貌與智慧並重的港姐冠軍,大家都以為Crystal多年來肯定有大量裙下之臣,戀愛經驗豐富。但原來現任男友Martin都只係佢第二個男朋友,咁大個女都係第二次拍拖,真係講都冇人信!至於初戀就係18歲時出現,第一次拍拖係入咗大學之後先發生!Crystal話因為自己由細到大都係讀女校,又好少參與甚麼聯校活動,所以根本冇機會識男仔;而且自己求學時期個樣非常「薯」,同依家分別非常大,仲被人懷疑有冇整過容!

MK那些年

講開港姐的那些年,森美即時上網搵番Crystal啲舊相,其中幾張見到佢染咗個非常「MK」的橙金髮色,再加紅色highlight,唔知佢當年染呢個頭係咪屬於「少不更事」?Crystal由細到大屋企管教都好嚴,直至入大學後父母先開始放寬,咁就同好多乖咗多年的女生一樣,盡情放肆一番!

第一次拍拖

上文提到Crystal第一次拍拖係入大學後,對象都好自然係大學同學,兩人初時都係由Whatsapp開始傾偈,認識咗半年先正式拍拖。第一日拍拖就係情人節,約去睇「狼人」曉治積曼主演的《孤星淚》。對方其實冇正式表白,睇戲期間就突然拖住佢手,Crystal當時緊張到手汗狂流,兩人完全唔敢郁,之後很自然就開始拍拖。

不過初吻竟然係拍拖一個多月後先出現,因為男方原來都係第一次拍拖,大家一路以來都規規矩矩。直到某一日坐喺電腦前,兩人突然就kiss了… 一啲都唔浪漫囉!小編聽到Crystal的故事都覺得好青澀… 雖然自己未試過。

Crystal同第一任男友拍咗兩年拖,當時大家眼中只有對方,甚至計劃將來會結婚。但去到最後半年時開始出現問題,因為大家都係第一次拍拖,每次出街都不外乎飲飲食食、行街睇戲,但男方就要求一啲「深層次」的對話,例如討論將來、價值觀或者生涯規劃等話題;反而Crystal想法比較簡單,認為開開心心就得,漸漸兩人分歧愈來愈大,拍拖兩周年的情人節後,Crystal就提出分手。

后冠 權杖去咗邊?

最後主持問咗一個應該多年來都冇港姐冠軍解答過的問題,就係冠軍后冠和權杖到底係咪可以拎番屋企?Crystal就表示官方會送出真的鑽石后冠,價值過百萬㗎!至於平時出席活動要戴的都只是水晶版本,以防萬一嘛!雖然平時根本唔會有機會戴,不過Crystal話可以效法前港姐冠軍張名雅一樣,結婚時用作頭飾,不過就絕對唔會賣咗佢!另外權杖就唔係屬於佢,因為要一代一代傳落去!

全文完

相關文章:

相差22年 無阻開花結果 郭富城低調入紙娶方媛

《春嬌救志明》最新預告 千嬅護士look色誘樂仔

15歲仙氣沈月 靚過媽咪邱淑貞

關注我們Facebook專頁
    相關新聞
      更多瀏覽