【邊個消費邊個?】周永恒女友話要爆阿Yu秘密:容忍有限度
2017年03月24日07:00

周永恒(Roy)因為搞婚外情,同出手打趙頌茹,最終搞到離婚收場。分居兩年後,本來早前法庭正式宣判佢哋離婚,不過呀周生冇去到,單嘢仲有手尾要跟。

不過最好搞笑嘅係,呀周生現任女友Britni,喺fb代男友出聲反擊阿Yu,話忍咗好耐,反問啲嘢係咪一定要曝光先可以平息件事:「懲罰都已經懲罰夠,代價就係俾幾百萬人鬧。可憐嘅位妳就攞晒㗎啦。唔通妳就一啲錯都冇?證據我都有,對方為咗保護妳唔公開,妳就冇再做傷害對方嘅事!」

Britni又話:「為咗你哋小朋友嘅將來都好。唔好迫我同媒體公開一直未公開嘅,妳嘅秘密。一個月做兩個新聞容忍都有個限度。撫心自問下咁做對對方公平嗎?」

隔咗陣Britni就再留言,話阿Yu呢兩年收足贍養費:「佢自己最清楚,金額接近1球(100萬)!周生通過乜嘢人俾佢都查得到。」問到證據呢?佢就話:「依家未適合公開,遲啲一定會交代清楚,咁對佢都公平。」

阿Yu接受報章電話訪問時,就話呢啲係第三者嘅事,佢唔會多作回應,又話自己行得正企得正,唔怕被威脅。阿Yu亦否認收過贍養費:「我真係收到呢1球,咁就真係好囉,應該可以風流快活囉!」

之後阿Yu喺微博連出兩個POST話:「把所有的不快给昨天,把所有的希望给明天,把所有的努力给今天。​​​」又話:「沒有人是100%快樂的,然而人的本性往往是把不快樂放大,想用盡一切方法把它們趕走,有時不知不覺連該用來尋找快樂的力氣都用盡了,其實只要快樂比不快樂多,這樣就足夠了!」

至於Britni呢,佢亦有出POST話:「對所有事情置之不理都係種能力,最近除jor傾工作上既事無其他興趣…」咁究竟邊個消費邊個呢?

關注我們Facebook專頁
    相關新聞
      更多瀏覽