【韓星攻港】李光洙屋企再被突擊?「長頸鹿」嬲爆要踢攝影機
2017年03月04日07:00

人氣綜藝節目《Running Man》,原定二月停播,不過後來經節目組同成員商討後,節目得以繼續,星期日就會播出今次風波後,重新出發嘅第一集!呢日節目組就公開多張預告圖,似乎李光洙會再次陷入公開自己屋企嘅危機!

睇開《Running Man》嘅朋友都知,光洙一啲都唔鐘意自己屋企被公開,不過七年嚟就足足突擊咗六次,而今次「危險的交易」入面,《RM》成員同製作組進行交易,若果成員同製作組進行嘅遊戲當中獲勝,就由製作組提供拍攝地,一旦輸咗就要選擇一位成員嘅屋企拍攝!

錄製入面,劉在錫等成員們一致認為李光洙屋企係最佳選擇,而製作組亦接受成員嘅建議,光洙知道自己屋企有可能再次被「突擊」後,即刻好嬲咁話:「敢去就踢你哋嘅攝影機!」

至於早前有傳《RM》會改播出時間,呢日有報道指,SBS方面話唔會改節目到平日播出:「《RM》依然會是週末節目,最多提早到星期六播出,如果冇太大變化,會繼續周日播出。」

另外,今個月《RM》五位成員宋智孝、李光洙、池錫辰、金鐘國同HaHa喺亞博館開見面會,不過數吓數吓,原來三月到五月,就足足有成十三個不同組別嘅韓星「攻港」,三月份除咗《RM》,仲有少女時代嘅徐玄同Yuri、JYJ成員金在中、Super Junior成員圭賢等都會嚟香港!

四月就有《奇皇后》男星池昌旭、《主君的太陽》男星蘇志燮見面會;去到五月就有男團B1A4、SHINee、SHINee演唱會,同埋《鬼怪》男星李棟旭開見面會!喜歡韓星嘅你有福了!

關注我們Facebook專頁
    相關新聞
      更多瀏覽