麥美恩終破Dry 暗撻無綫主播許文軒
2017年03月01日14:58

剛過30歲生日的無綫上位姐仔 麥美恩 (Mayanne),早年與黃心穎、李佳芯等人主持綜藝節目《學是學非》後人氣急升,其性格爽朗又帶點傻氣,形象非常討好,無論開電視或者公開場合都經常見到佢!雖然事業起飛,不過Mayanne的愛情路似乎不及另外幾位拍檔順利,單身多年,早前更被媽媽催婚!但其實佢性格討好又靚女,點會冇裙下之臣?今日有報道指Mayanne暗中撻着無綫娛樂新聞主播許文軒 (Edmond),獲對方送花又做柴可夫司機接送,成功破Dry!

撰文:東方新地

圖片:Instagram

傻大姐麥美恩

出生於加拿大的Mayanne剛在2月28日度過30歲生日,佢在卑詩省華人重鎮列治文(Richmond)成長,並於名校英屬哥倫比亞大學主修化學。Mayanne回流香港後參加2011年的港姐競選,最終奪得第四名。雖然未入三甲,不過後來佢加入娛樂新聞台成為主播,亦經常擔任大小活動的司儀,偶爾亦會客串劇集。

主持《學是學非》上位

至2013年,Mayanne成為綜藝節目《學是學非》的主持之一,雖然知名度不及其他幾位,不過佢在節目中願意放下身段,經常有爆笑演出,真摯不造作的感覺相當親民,「傻大姐」形象深入民心!而事實上Mayanne樣子相當不俗,眼大大、笑容甜美又有可愛酒窩,觀眾緣爆燈!

破Dry暗撻主播

在幾位是非精如黃心穎、李佳芯及湯洛雯等都紛紛有另一半 (緋聞) 之時,男仔頭的Mayanne表面上感情一直未有着落,不過原來已成功覓得另一半!今日有報道指Mayanne近日努力keep fit,成個人清減了不少,而且人前人後都表現得好風騷,皆因與娛樂新聞台主播許文軒 (Edmond) 暗撻!Edmond被拍到拎住大紮鮮花,去到Mayanne位於將軍澳的寓所接佢,據知悉心打扮的Mayanne見到Edmond即時含情脈脈,不時露出招牌雙酒窩甜美笑容,好sweet!

之後兩人雙雙登上七人車去到九龍灣,到一餐廳會合主播潘盈慧等一行人。Mayanne與Edmond面對面坐,席間多次眉目傳情,男方又不時望住Mayanne冧笑,一行人逗留個多小時離開。

娛樂新聞台主播 許文軒

1981年出生的Edmond現年35歲,2003年時曾參加全球華人新秀歌唱大賽,成為悉尼區選拔賽冠軍得主,現時在TVB娛樂新聞台節目《StarTalk》擔任主播。有睇TVB娛樂新聞台的朋友對佢一定唔會陌生,因為佢曝光率都算幾高,訪問過的紅星名人多到數唔晒,Edmond身高180cm,外形不俗,而且同Mayanne一樣有可愛酒窩,都幾襯㗎!

同Mayanne老友鬼鬼鬼的森美,接受訪問時表示唔知兩人拍拖,不過就大讚兩人外貌好相襯,因為都係鼻大大,好有夫妻相!而且一眾「是非精」排住隊被爆戀情,如今Mayanne亦有着落,身為「隊長」的森美都安樂晒!

全文完

相關文章:

《親親我好媽》 熊子逸 被揭悲慘身世

Rap盡社會百態 回味農夫10首金曲

《 親親我好媽 》青澀小情侶 江嘉敏與何廣沛最感人告白

關注我們Facebook專頁
    相關新聞
      更多瀏覽