熊子逸身世悲慘 薛家燕曾施援手
2017年03月01日20:05

在無綫劇《親親我好媽》中,飾演江美儀細女「嚴茜聰」的13歲小演員 熊子逸 (Sophia),日前接受訪問時透露悲慘身世,原來佢8歲時曾捐骨髓救患白血病胞弟,9歲時目擊表哥被一名跳樓婦人壓死… 對一個小女孩來說實在係好難承受。幸而Sophia當年得薛家燕出手相助,家燕姐除了2萬元幫助解燃眉之急,又帶Sophia返家留宿及睇醫生,家燕媽媽真係無得頂!

無條件伸出援手

Sophia係家燕姐創辦的「家燕媽媽藝術中心」的學生,當年目睹表哥慘死後,佢幾乎天天以淚洗面,晚上經常會發噩夢喊醒。正在眾人忙於籌備表哥的身後事期間,家燕姐對Sophia一家無條件伸出援手。佢先係送上2萬元現金助佢哋解決燃眉之急,之後又接了Sophia到自己屋企暫住一星期。期間Sophia經常獨自匿埋喊,家燕姐女兒一直陪住佢,去杭州表演都帶埋佢,順便散散心。

另外Sophia因為情緒受困擾而又痾又嘔,於是家燕姐親自帶佢去睇心理醫生,包辦所有醫藥費,Sophia一家對家燕姐的恩情沒齒難忘。

支持Sophia外國升學

對於Sophia在《親親我好媽》中表演突出,備受觀眾讚賞,家燕姐接受訪問時表示感到安慰,另外透露去年Sophia與哥哥一同到新西蘭留學一事,自己亦有與其媽媽商量及俾意見。反而係Sophia覺得唔好意思,因為感覺上拍劇剛剛有成績但又飛到外國,浪費了一番心機。不過家燕姐認為人最重要就係有學識,讀完書返嚟再做演員都唔遲!所以好支持Sophia去外國留學!

真人真事微電影

在2013年,家燕姐將Sophia捐骨髓救弟弟的故事拍成微電影,並由Sophia親自演回自己,希望故事可以帶來正能量,鼓勵世人。當年家燕姐透露自己投資了百多萬,家燕姐當時笑說唔少朋友以為佢發燒,倒錢落海,但家燕姐認為此事可以提升小朋友對演藝工作的認識,而且給予來自不同地方的小朋友,一個難得的交流機會,所以絕對值得!

全文完

相關文章:

韓風密密吹 男神女神輪流襲港

麥美恩終破Dry 暗撻無綫主播許文軒

《親親我好媽》 熊子逸 被揭悲慘身世

關注我們Facebook專頁
    相關新聞
      更多瀏覽