巴士司機 有話兒 | 3大苦處 你估我想飛站架咩
2017年01月26日18:20

見到最近嗰單巴士翻側導致一名乘客死亡,身為巴士司機一定有心酸,但係其實做巴士司機呢份工,都唔係咁易!就好似農曆新年全世界都有得放假,但佢地就一樣要番工,車大家去唔同地方拜年!呢篇文要向番佢地致敬,同埋俾大家知份工嘅心酸, 巴士司機 有話兒 !

文:經濟一週 | 圖:網上圖片

有苦只得 巴士司機 知

好多時脫班都唔係我哋想架,有時乘客多、有時遇著塞車,不過啲客有理無理都打去投訴,仲會一上車就大大聲指住嚟鬧,畀人投訴仲會搞到無年終酬金。開頭都會覺得好嬲,但鬧下鬧下已經無感覺唔會出聲,因為我一開口,佢哋就鬧得愈起勁,成程車不得安寧。

有時又會畀人指住嚟鬧,就係閂咗門之後追車的乘客,有時我哋唔會再開門畀佢哋上,因為依家啲新車,每次開門前都要拉手掣,閂門之後先鬆手掣,而每次等度門閂埋都要7,8秒。次次有人追車都要開門畀佢嘅話,開得畀一個,又會有第二個跑嚟,分分鐘要等多1分鐘先離到站。

01 | 人有三急都要忍

人所周知,做巴士司機無得定時去廁所,一轉車起碼都半個鐘,遇著塞車,急起上嚟真係唔知點算,所以做呢行好容易有腎病。

02 | OT好少錢

呢行做到60歲就由全職轉兼職,兼職人工的計法係每人編咗更嗰幾個鐘就以時酬計算,如果OT就以分鐘計算,但OT的錢得好少,所以好多師傅都寧願趕收工唔OT,變咗尾個程車揸快啲或者飛站。

以前揸開嗰條線就係一直揸嗰條線,依家又派到一日揸幾條線,要熟習幾條線,隨時調嚟調去,好容易就行錯路。

03 | 一星期返6日

雖然招聘廣告上面寫新入職有萬九蚊人工,但係只有第一個月有底薪有bonus先有呢個數,其他時侯就要日日OT先有呢個人工。巴士司機基本工時係9個鐘,但通常每日都係10個鐘多啲。一星期仲要返6日,得一日放假,過時過節仲一定無假放,真係好大壓力。

圖片來源:九龍巴士官網

相關文章:

回應施永青郊野公園及環保人士論@香港山女

情人節去邊好? 二人世界酒店推介 – 香港篇

日本人氣算命師 | 預測2017年 12星座旅遊運

關注我們Facebook專頁
    相關新聞
      更多瀏覽