回應施永青郊野公園及環保人士論@香港山女
2017年01月26日15:37

(編按:中原集團主席兼總裁施永青,響應梁振英《施政報告》建議利用郊野公園內生態價值不高、位於邊陲地帶的土地建公屋等,日前於《am730》專欄表達支持動用郊野公園土地立場,直指「環保只是人類自己弄出來的概念,地球可沒有這樣的需要」,此番言論惹起愛護香港郊區的群組及博客猛烈反駁及回應,其中一直致力推介香港戶外遊的香港山女更撰長文逐點駁斥回應--)

思考和組織咗幾日,總結了一點回應,關於施生責罵環保人士和阻礙發展郊野公園論。山女不才,實在提唔出一啲好實用有效可行既房屋政策建議,但至少希望大家唔好畀施生混淆視聽!!佢成篇嘢好有邏輯謬誤!!!

施生呢番言論,根本係強詞奪理、混淆視聽!佢自己係中原地產嘅老闆,賺咁多錢,竟然話人阻止發展郊野公園,講得咁好聽,心個句咪即係阻住佢賣樓搵錢!

『環保並不是為地球,而只是為了人類自己吧了』-

呢句說話更加唔係人講嘅說話,佢有份生存喺呢個地球上,就有責任為人類下代著想,呢樣係常識吧?佢自己短命,短視,只顧自己眼前利益,先可以講出咁嘅說話!

『很多「環保人士」,自己已有樓住,還要攬着郊野公園不放,可有考慮過住在劏房的基層,天天為口奔馳,根本沒有餘閒去逛郊野公園!』-

更加係無根無據,佢要咁講,就請佢拿出實質統計數據,到底有幾多佢口中講嘅呢啲有樓的環保人士?同埋佢幾時有統計過,所謂「基層劏房戶」冇餘閒去郊野公園?佢身為公眾人物,擁有傳媒機構,影響力咁大,就唔應該講啲咁不負責任嘅無憑據說話,請佢拿出實質數據來!而且就算環保人士哋有樓,爭取保護環境又何罪之有?郊野公園冇咗就係冇咗,一棵樹斬咗要幾多年先生返我諗小學生都知,施生冇理由唔知吖。斬一棵樹只消幾小時,種成大樹讓後人乘涼要幾十年!而且事實是香港仲有好多其他地方可以發展,例如棕地,但點解一諗就要打郊野公園主意,原因就係嗰度冇人住緊,所以預期反對聲音不大,呢個只係欺善怕惡嘅政府行為!

油塘: 魔鬼山炮台(攝影:香港山女)

而且郊野公園嘅價值根本不止在於休閒用途,政府近年自己都積極拓展呢方面嘅旅遊業吧?香港係靠金融、旅遊等行業支撐經濟,而旅遊業近年經常話冇乜新IDEA,綠色郊野旅遊唔係正正係政府打算研究嘅方向嗎?從近日旅發局嘅宣傳短片都可見一班吧。

『香港一個家庭平均才住一個500呎的單位,其他城市(生產力接近的)普遍可以有1,000呎』-

呢個講法亦極之不公道,更無COMMON SENSE。佢用咩城市同香港比?比較嘅呢啲城市本身面積有幾大?我本身雖然對呢方面資料不夠熟悉,無從批判,但亦希望施生喺提出呢啲語不驚人誓不休的言論時,亦拿出背後的論據,拿不出就不要空口講白話,自己坐擁傳媒和地產事業卻利用自家影響力講呢啲唔負責任嘅問題,或者一班冇咁心水清嘅人就認同咗佢,令社會繼續更為分化!

香港,真係無土地?

其實香港樓價高企有好多因素,不能單單歸咎於無發展郊野公園,而搵地發展亦有好多選擇,我唔係咁叻,除了新聞見到的高球場和棕地,相信仲有好多只係我哋呢啲小市民唔知,負責房策嘅官員總會知道啩!但我一直唔明,點解政府咁多地拎出嚟賣畀私人發展商,唔留嚟起公屋或居屋?發展商起完樓又賣到咁貴,小市民梗係負擔唔到啦!呢個唔係先係香港樓價貴嘅癥結所在咩?點解政府會有地賣畀地產商,又冇地起樓畀基層?庫房經常因為賣地而水浸,點解啲錢唔用返在基層市民在樓市方面?

重建拖拖拖 為何針對郊野公園?

而且其實香港仲有好多地明明係荒廢了,等重建但又一直拖拖拖,港台節目都介紹唔少!例如好多街市、市政大樓、舊樓區,施生講到咁偉大,點解唔出合理賠償金去收購然後重建?新界一直有囤地、原居民等等,點解政府唔去搞咗個啲先諗郊野公園?講到尾咪又係欺善怕惡!如果有合理金額賠償,相信有好多舊樓可以重建,但商家和政府就係呢啲位勒住荷包,如果施生講到自己咁偉大,何不拿點錢出來為香港樓市做多一點?而唔係單單責罵環保人士?

南朗山(攝影:香港山女)

講到尾,地產商,梗係只為自己利益發聲吧!真係睇完嬲完得啖笑!

山女不才,我想舉一些數據和例子,但實在要花更多時間去搜集和求證,我真係唔係呢方面嘅專材。方向:比較香港和新加坡的郊野公園地積比;香港和新加坡政府樓和私樓比例;香港2016年賣咗幾多地畀發展商起私樓、賣地為庫房賺了幾多錢、用咗幾多地起公屋或居屋;香港有幾多棕地,或荒廢嘅用地,等重建但一直拖字缺… …等等等等

相關文章:

情人節去邊好? 二人世界酒店推介 – 香港篇

日本人氣算命師 | 預測2017年 12星座旅遊運

一田西環分店2月登場!萬呎Hello Kitty主題超市原來位於…

關注我們Facebook專頁
    相關新聞
      更多瀏覽