麥雅緻孖囡囡 餅印扮小雲
2017年01月04日15:30

事業家庭兩得意的無綫藝人張頴康,襯唔使開工帶埋太太 麥雅緻 (Angie)同囡囡張雅喬(小豆)去搵小雲小吉。原來Angie係《IQ博士》的超級粉絲,所以自小已經成日戴住副大眼鏡扮小雲。而事隔多年,Angie呢日亦幫囡囡打扮成小雲去影相。咦,小豆一定係遺傳咗Angie,兩母女一模一樣樣,唔落足眼力都分唔清邊個係Angie,邊個係小豆!

圖片來源︰張頴康 麥雅緻 Facebook

戲內戲外都係好老公的張頴康,與太太Angie和囡囡小豆經常在Facebook分享日常生活,而呢日阿康就帶埋打扮成小雲的太太和囡囡去天神村搵《IQ博士》的小雲小吉。Angie作為《IQ博士》的超級粉絲,自小就已經成日戴住副大眼鏡扮小雲。當Angie將自己童年照同小豆扮的小雲放埋一齊,眼鏡一樣,表情一樣,連髮型都似到足,真係唔落足眼力都分唔清邊個媽咪,邊個係囡囡,兩母女都一樣cute爆!

除咗扮小雲之外,小豆更分身打扮成小吉。小豆眼仔碌碌,表情多多,扮咩似咩,仲好識擺甫士,一定係同時遺傳咗媽咪靚樣同爸爸的演藝細胞!

另外,Angie又留言指張頴康仲未出動扮「草菇」!唔講唔知,原來佢哋一家三口都好鍾意扮《IQ博士》,當Angie變成小雲、小豆變成小吉時,張頴康就變成草菇⋯⋯ 一齊重溫吓佢哋一家三口一年前的cosplay啦!

全文完

相關文章:

楊怡演舞台劇 謙謙巨型花牌冧老婆

陳禛 嬲爆爸爸陳國邦「偷食」

多次夜訪香閨 馬明暗撻黃心穎一年

關注我們Facebook專頁
    相關新聞
      更多瀏覽