多次夜訪香閨 馬明暗撻黃心穎一年
2017年01月03日16:18

下個月就43歲的「天然呆」馬國明( 馬明 ),向來被視為無綫的超級筍盤,但自2012年與胡定欣分手後感情一直未有著落,心儀的契妹唐詩詠又被洪永城私有化。不過筍盤又點會冇女埋身,今日有報道指馬明已經和大台小花黃心穎暗中撻着逾一年,心穎BB更經常深夜駕車「偷運」馬明回香閨密會,睇嚟大家經常擔心馬明的感情事,似乎係多此一舉啦!

圖片來源︰新傳媒資料庫、微博、Instagram

入行後兩段情

馬明被封為超級筍盤,入行多年,兩段情都是與圈中人發展。06年馬明被爆與曾華倩發展姊弟戀,兩人被影到拍拖勝地鯉景灣撐枱腳,更被發現曾華倩開車載馬明返香閨過夜,但兩人都死口不認戀情;後來馬明與合作《舞動奇跡2》的胡定欣撻着,但有指女方嫌棄馬明為人老土、悶餅,馬明亦透露曾因冇梳頭、唔打扮、不修篇幅而激嬲定欣,拍拖三年後分手。

做義工順道相睇

馬明下月就四十有三,年紀唔輕加上阿媽已經多次催婚,所以早前在胞姊的介紹下,到尖東做義工順道識女仔!期間馬明除剩背心晒肌,將多個紙皮箱逐一搬上車,風度盡顯。另外又跟一名長髮女義工傾談,不時講笑以免有冷場,對天生天然呆的馬明,已經躍進一大步!

女追男成功

雖然馬明出名「天然呆」又係怕醜仔,不過既然係超級筍盤,又點會冇女埋身?今日有報道指,馬明與被封為「新一代姣精」的宅男女神黃心穎已經撻着逾一年!原來心穎BB一直傾慕馬明,視對方為「男神」,每次在公司活動相遇,心穎例必捉住馬明貼身影相,之後在社交網站晒合照。而去年兩人拍《為食神探》時,更造就機會令心穎女追男成功!

夜訪香閨

心穎現時與胞姊黃心美同住在位於油塘的Ocean One,有住在同一屋苑的住客聲稱,多次在凌晨時分目擊心穎BB駕駛其美國Jeep牌越野車,偷運馬明直入住客的專用停車場,然後乘電梯上樓密會!據知心穎係此舉係為了配合馬明將戀情密冚的習慣,所以拍拖時多是留在兩人家中,談談心玩玩狗,以免戀情「見光死」。

奉獻「第一次」

四年前選港姐入行的心穎BB,其實早早已公開宣稱自己係馬明Fans,仲話好恨同對方合作拍劇。直至2013年,心穎第一次參演電視劇《On Call 36小時II》,客串飾演病人時,難得與偶像馬明有同場對手戲,事後即時在IG晒合照,話好開心將「第一次」奉獻給對方!

之後心穎與馬明再次合作拍攝《為食神探》,其中一場戲講述心穎以小背心谷胸上陣色誘馬明,當時女方被指是假戲真做,盡騷激凸身材之餘,又賣大包與對方零距離身貼身,馬明都被電到暈得一陣陣!

全文完

相關文章:

2017第一喜 42歲楊采妮懷孕五個月

奇門遁甲 雲文子2017雞年 肖猴運程

50歲溫碧霞 晒噴血三點式寫真

關注我們Facebook專頁
    相關新聞
      更多瀏覽