【紅白】YOSHIKI疑似受傷 結衣BB跳「逃恥舞」 
2017年01月01日07:00

X JAPAN隊長YOSHIKI完成香港亞博舉行嘅免費音樂會後,隨即接受日本嘅網上直播節目訪問。雖然香港場騷一波三折,但佢冇怪其他人,反而仲向拍檔,為自己去唔到綵排道歉!

原本佢星期五要為日本年度除夕盛事《紅白歌唱大賽》綵排,不過因為要搞免費音樂會補償畀粉絲,令佢被迫缺席綵排。不過呢日佢返到日本後,就即刻由機場趕去電視台爭取時間綵排,認真敬業!

至於歌唱大賽方面,今年就由有村架純首次擔正做紅隊主持,佢仲拍住嵐成員相葉雅紀以和服登場,而YOSHIKI亦都同隊友一齊現身,但見佢包住右手出場,似乎係開騷後觸發舊患!

另外,TBS電視台大熱劇《逃跑雖可恥但有用》掀起嘅「戀愛舞」 ,亦都有係今次《紅白》度出現!星野源唱出主題曲《戀》嘅時候,雖然女主角新垣結衣今年擔任大會評判團之一,但都有坐喺度跟住跳左一小段,非常可愛!

關注我們Facebook專頁
    相關新聞
      更多瀏覽