愛妻號陸永日日報告? 《嘩鬼上學去之 農夫 篇》花絮獨家爆料
2016年09月22日09:00

睇咗幾集都知, 農夫 兩子陸永同C君即使無咗DoDo姐都一樣咁好笑,英國留學即使慘被地獄式體育訓練都示範到「嘴失禁」,真係要俾啲掌聲!不過幕前好好笑,幕後停機時會唔會係只齋玩手機?定依然無時停不停亂噏當秘笈?出名係愛妻號的陸永又有無日日越洋報告?或者變做甩繩馬騮放監唔理愛妻愛女?今次幫大家追問監製獨家爆料,即睇!

01| 陸永愛妻號 每日準時越洋報告

陸永結婚五周年再向太太求婚,震驚香港七百萬人,仲令佢成為「愛妻號」!去到英國,係咪一樣咁絕種好男人?監製就力證佢係「超級愛妻號」,每逢停機準備Set Up或搭車時,陸永都一定越洋報告同哄哄家中千金,仲要唔係簡單報平安,而係耐心將所有行蹤逐一報告,誇張到監製都忍唔住話:「你老婆未睇都已經知道晒所有節目內容喎!」「愛妻號」果然名不虛傳!

陸永結婚五周年再向太太求婚,好浪漫!

經常Post晒命一家合照,今次仲不停越洋報告,愛妻號Level升級!

本身陸永堅持唔會俾愛女去外國讀書,但嘩鬼旅程完結,佢反而有全新感受:「其實香港同英國教育制度真係各有各好,不過係外國讀書會有好多不同的經驗,就例如香港小朋友可能呢一世人都唔會爬過樹,但外國老師反而叫小朋友盡量去試,滿足好奇心,我覺得呢個教育方法真係好好!」

陸永女女勁得意,難怪佢本身唔捨得送女女去外國讀書。

農夫遲到被罰要陪小朋友爬樹,佢地最Surprise係老師完全無阻止,反而叫小朋友盡情玩!02| 英磅跌都無去Shopping?因為要陪DoDo姐!

拍攝《嘩鬼上學去》正值7月頭英國宣導脫歐,英磅插水式下滑,咁好機會佢地有冇去掃貨呢?監製就話拍攝行程超趕,Free Time只得最尾半日,不過DoDo姐見身,兩位乞兒當然去陪娘娘去Harrods啦,之後情況同《跟住Do姐去Shopping》一樣,農夫當然係有得睇無得買!Do姐事後叫佢地去機場Duty-free睇,點知原來陸永想買啲品牌係機場係無專櫃的,所以……最後係咩都買唔到!Sosad!

Do姐出動,農夫又點會唔去服侍娘娘呢?所以,Do姐有收穫,佢兩個咪陪行街囉。

監製都話拍攝行程超趕,最誇張係4am集合去練游水,影到夜晚先收工,難怪佢哋無心情Shopping,一有機會就攤係地。03| 農夫係即場爆肚?定係事前諗Gag?

節目咁好笑,監製就話其實70%係Roll機前已經傾好,所以拍攝場景其實有Set up,不過佢自己就覺得另外30%即場爆肚其實更好笑,就如試校服時,佢地係預計嬸嬸會突然叫佢地自我介紹,好彩C君陸永轉數快,即刻答到Andy Lau同Jackie Chan,場面好好笑!監製最多謝佢地係有時度咗穚但唔好笑,佢地即場爆肚都救得返,實在好厲害!

拍攝團隊其實只有5個人,所以諗穚好多時都要農夫幫手,不過監製大讚佢哋兩個投入度高!

即場爆肚話自己係Andy Lau同Jackie Chan,監製話係當日最無厘頭但好好笑的場面。04| 惡搞老師 真發嬲!

不少網民都話第一集,農夫惡搞老師實在無大無細!唔知老師有無嬲?其實9成老師、舍監和同學仔都好鍾意佢哋,不過上堂時,拉丁文老師同美術老師對於佢咃惡搞都俾唔到反應,而且真係有啲嬲,好彩佢地兩個識做,即刻哄返老師,而且發揮搞笑功力,場面先唔怕太尷尬!其餘時期農夫同朋友仔都相處融洽,臨走時同學仔都好唔借得!

玩到咁,我係老師都嬲吧!

因為事前有溝通,老師拍攝時其實已經盡量唔黑面,開心講解。

但示範時依然忍唔住有少少黑面。

相關文章:

大埔新開「 放題 」! 日式炸物自己炸 |大埔食乜好|

黃偉文力撐! 6個台灣歌手林宥嘉、Hebe愛 廣東歌

輕鬆駕馭夏日!!! 跟時尚達人學 ~ 5款「 涼鞋 」穿搭術

關注我們Facebook專頁
    相關新聞
      更多瀏覽