【等埋位有咩好做?】大台後生演員改歌詞玩轉藝員名 網民Like爆
2016年09月15日07:00

由蕭正楠、黃智賢、姜大偉、陳凱琳等主演嘅TVB劇集《翻生武林》正在開拍中,一班演員唔洗埋位時可能都係㩒吓手機玩自拍,不過有份喺劇中飾演一角嘅董敬文、盧峻峯同譚永浩就歌癮大發,即場同一班主角、甘草大玩改歌詞,仲將佢哋嘅名加入歌詞,仲話每個人都有一首自己嘅主題曲,雖然好小學雞咁改詞,但就勾起唔少網民嘅兒時回憶,個個睇完都比Like。

講返段片,幾位大男孩先搵咗陳凱琳,喺佢隔離唱「陳凱琳 是非 我細細聲講給你」,將Twins嘅名曲《女校男生》頭兩句改編,搞到Grace望住佢哋幾個好尷尬,又忍唔住笑。之後佢哋就轉場,搵咗簡慕華唱,歌詞係「插班生甲 動作簡慕華,我真是好奇」,簡慕華聽到好冧,仲跟歌詞擺埋動作,認真配合。

然後到甘草員陳榮峻,佢嘅歌詞就改自《前程錦繡》,仲好有氣勢:「陳榮峻 氣魄更壯」,唱到「斜陽落下 心中不必驚慌」陳榮峻仲同佢哋幾位一齊合唱兼做動作,非常交戲。

到好戲之人蝦頭楊詩敏,唔知係唔係比較玩得,佢哋就將盧巧音嘅《垃圾》改成蝦頭版:「楊詩敏是半張廢紙 讓我化蝶」,蝦頭未唱已經忍唔住笑爆咀,仲扮蝴蝶。之後就係《愛回家》嘅鐵腳KC歐瑞偉,都係盧巧音嘅歌《三角誌》改編,「瑞偉哥 跟你有段情 我也為你高興」。

06年香港先生姚浩政都有份,佢嘅歌詞係「姚浩政的眼睛 流淚看天際帶悲憤」,男仔又點會唔識Beyond嘅歌,唱唱下幾個位都好High。最後就係甘草冼灝英,佢嘅版本係《雷霆掃毒》片尾曲《幼稚完》,「冼師傅 最近幸福嗎 每日忙碌嗎 仍然是那麼認真嗎」,冼師傅就好似唔知發生咩事咁,不過聽完歌詞佢就回咗句:「你知就好啦」。

段片上載咗去「喂 霞姨」嘅facebook 專頁,唔少人都爭住Like。蝦頭都有份推Post。佢哋三位都係TVB嘅藝員,其中譚永浩最近仲幫電影《點五步》唱主題曲,佢喺英皇新秀歌唱大賽2010仲拎過金咪大獎。相信今次條片被瘋傳,大家都知佢哋幾位好玩得又好唱得喇!唔少人都留言都讚佢哋好有才,仲叫大家多多支持年輕演員㗎!

關注我們Facebook專頁
    相關新聞
      更多瀏覽