【換票証減價都冇人要】被譽為最爛港產片《江湖悲劇》負評多 
2016年09月04日07:00

近排有唔少港產片口啤唔錯,吸引到唔少觀眾入場支持。不過,唔係套套打正港產片旗號,就代表好睇。好似最近新上映嘅《江湖悲劇》,就被網民話係2016最爛港產片,甚至「媲美」《天機·富春山居圖》!

呢套《江湖悲劇》由林超榮執導,卡士亦都唔差,有陳小春、譚詠麟、伍詠薇、戚美珍、蔡潔同埋蔡瀚億等,曾任編劇同演員嘅林超榮,今次係首次執導電影,佢嘗試以「笑」論江湖,即係拍笑片喎!

套戲講陳小春係一個大佬,而譚詠麟就係一個和事佬,靠唱歌解決社團嘅紛爭,之旦係無啦啦又發現,譚詠麟先係真正嘅社團大佬;而伍姑娘明明係陳小春老婆,本身話要陷害譚詠麟,但後尾又做咗譚詠麟好朋友;最搞笑係,譚詠麟最尾喺輪椅企起身,然後又一齊唱歌,經典過大台啲bbq大結局。

網民睇完亦話,啲所謂笑點完全笑唔出:「《江湖悲劇》裡面,悲劇原來係講緊坐喺度睇晒成部戲D觀眾。」、「唔好曬錢睇,完全覺得套戲九唔搭八。」,更有人話:「睇到一半有一半人走咗,你留到完場講得出成場戲做咩我話你叻。」最慘嘅係,網上有人賣呢套電影嘅換票証,但減咗價都冇人買,正宗「冇價冇市」!

不過林超榮依然好樂觀,佢話:「各有各批評,大家有大家意見,由佢票房自己跑,大家多多支持。」

關注我們Facebook專頁
    相關新聞
      更多瀏覽