【大師兄返嚟喇】MK-Pop始祖E-kids宣佈重組!
2016年08月21日07:00

MK-Pop始祖E-kids解散後,事隔十年後先彈出天堂鳥同FAITH,不過呢兩隊新晉MK-Pop先後出事,亦慢慢淡出MK-Pop嘅世界。唔知係咪睇中家陣香港樂壇已經冇晒MK-Pop代表,既然後浪推唔走前江,E-kids唯有親自出馬,宣佈將會原班人馬重組!

呢日前E-kids成員林詠倫同劉威煌及可嵐等人,去到尖沙嘴出席酒吧騷,林詠倫接受訪問時順便對外宣佈呢個消息,佢話:「原班人馬搵番Tommy仔(阮民安)同阿Tim(郁禮賢),之前已經去咗日本錄歌,今年內會成事。」

問到擔唔擔心趕唔切參加年底頒獎禮?林詠倫話:「過咗咁多年,只想唱歌畀fans聽,過去E-kids個朵唔係咁好,好似MK pop咁,我哋今次都係跳舞唱歌,但會係長大之後嘅感覺。」不過阮民安就未有回應啦,即使有fans話:「你係咪真係重組呀!我要做歌迷會會長 !」佢都係冇回應,只係貼出自己喺ViuTV嘅節目相,留言話:「講真!!新節目嚟計,幾好睇woo!!」

E-kids2002年正式出道,可惜2006年就解散。去到2013年,林詠倫同Tim重組成為E-kids@2,於九展開演唱會。不過之後,就只有阮民安仍活躍於樂壇,更有「樂壇小強」之稱,多年嚟都打不死!

關注我們Facebook專頁
    相關新聞
      更多瀏覽