東涌 新「片場」! 超逼真 懷舊 九龍城 寨 | 東涌好去處 |
2016年08月12日18:35

被政黨選為全港最貴街市的 東涌 「逸東街市」,以往負評如潮,近日做完三個月大裝修,用咗2,500萬元改頭換面「變趣啲」,變成「 香港街市 」,進化為充滿 懷舊 味「大片場」,以60、70年代 九龍城寨 風光作背景,播住陳寶珠主唱《女殺手》,冷氣全開放,好有主題樂園feel!

撰文:彭美芳 攝影:張志孟

睇景點!

最浮誇! 呢隻紙飛機就勁啦!足有11米長,是全個「片場」最誇之作,由本地紙紥師傅親手做,仲有紅、黃色警示燈,真到呢!

最揼本!這個是英政府時期的「堅」皇冠郵筒, 是去拍賣會bid返來,歷史真品呢!

最全面!為了要連戲,外面的小食店裝修也採用唐樓格局。

最古老!這間士多舖用了50多年歷史的座地汽水櫃,仲work㗎!

最寬敞!嗱,大家都見到啦,五個大人平排一齊行都無問題。方便大家影相,唔阻街坊購物。騎樓底:懷舊景點 逐個捉

「香港街市」的最大特色是其天花設計,特高樓底營造舊日九龍城寨街景,除了頂部有「飛機」經過,周圍也貼上老街路牌、舊廣告招牌,當鋪的「押」字燈牌更是長時間亮著;舉頭一看,還有晾衫竹加幾件婆仔衫掛在「樓上」,設計甚有心思,完全超乎一般人對街市的想像。除了周遭的裝飾和攤檔的設計,就連厠所都好玩嘢,來到真係忍唔住要selfie!

唐樓賣糖糕 懷舊主題的街市,也引入港式糕點,好似缽仔糕、白糖糕等,仲有蝦米腸粉,$10有3條,抵呀!

原始雞蛋檔 仿效早期街市用竹籃賣雞蛋,內地蛋大約$10有7至8隻, 美國蛋就貴少少,$10有6隻。

麻甩真漢子 舊陣時家家戶戶都用石油氣,一架單車可以放幾罐,重到不得了,送石油氣工人真係好厲害。

老土搪瓷盆 這幾個洗面盤造型的洗手盆,真係十分懷舊,還記得睇過粵語長片,吳楚帆總會在這類盆吐血,反映香港基層的悲歌。

戲院服務台 戲院售票處坐著年輕的女子,都是街市管理處的服務員,大家可在這裡登記做會員,以及換取總值$20的優惠券。東涌獨家 深宵食堂

東涌逸東邨區內搵食艱難,少有開至深宵的食肆。新裝修後的街市,把原本在街市內經營的幾間食店,改為面向行人休憩空間,五間小店相連變成小食街,現時已有部分店舖營業至凌晨2時,更計劃未來全條小食街24小時營業,希望做逸東夜市!而街市內都有一些出面少見的麵包、蔬菜,大家不妨來發掘下,頗有驚喜的。

戶外食檔計劃未來會24小時營業,可以變做逸東夜市喎!

(左上) 宇治抹茶沙冰 $25 / 我愛台妹(4號舖)

(左中) 冬蔭功雜錦湯河 $35 / 逸東泰國(3號舖)

(左下) 鮮果涼粉 $15 /味食店(2號舖)

(右下) 豆腐花 $8 / 珍珍豆花(6號舖)

(右上) 咖喱魚蛋 $6 / 裕發(1號舖)

小露寶麵包 $13.5 「百樂餅家」獨家生產了小露寶包,有香腸眼、蛋黃鼻同火腿笑笑口,可能取其小露寶開心的神髓吧!

真•小露寶 「都唔係咁似我啫!」

新鮮香蕉花 $6/個「明麗士多」老闆娘和東涌居民好熟,不時向村民拿到鮮採香蕉花,她教用韭菜同辣椒一齊炒,或者用咖喱燜,非常香甜好味喎。

芥蘭頭 $10/兩斤 「青綠蔬菜」職員介紹返,出面一般賣緊$10個,而呢度就平一半,只希望街坊鍾意食,買多啲!街市出招洗底 街坊好受落

這個「片場」街市營業頭半個月,已獲得街坊好評,不但價錢比以往平,亦大讚地方亦更闊落唔會跣親。其實今年上半年,土地正義聯盟成員曾多次到逸東街市(「香港街市」前身),抗議管理商建華及領展,漠視高物價,雙方多次爭論及衝突。街市現在改頭換面重開,物價普遍持續低水,終於和區外街市相若,更有不少噱頭招數吸客。

第一招:街市DJ 叫賣

這位著格仔衫、頭戴假髪的party man,又跳又叫好落力,他其實是街市DJ,每日去不同檔口,幫手宣傳特價貨。採訪當日,佢就幫手促銷$2斤白蘿蔔。

第二招:特色店舖

街坊理髮店這裡連理髮店都有,裝修懷舊帶點簡約,$55剪到個靚髮。

第三招:$2現金券

管理公司推出會員制,去服務台做會員就可享消費優惠,不過試行初期,有商戶唔肯收優惠劵,不願蝕賣貨品,引來紛爭。

廖小朋友(大嶼山長沙居民):去街市唔再嘔

「以前嚟親街市都嘔,而家就好涼好舒服,我仲以為有人喺街市住。」

何小姐(逸東邨居民):唔想變景點

「街市都係師奶買餸地方,人來人往,要變景點唔係太好。」

香港街市

時間:7am-8pm

地點:東涌逸東邨

交通: 東涌站轉乘38號巴士,車程約10分鐘。抵達逸東商場,街市在商場旁。

電話:3977 4687

相關文章:

香港博物館節 !6大精選免費有趣活動

廣島國寶級大師傑作 筆祥苑 萬八蚊一支化妝掃!

試食法國曲奇總有河國榮 @Dining娜

關注我們Facebook專頁
    相關新聞
      更多瀏覽