【耕開就有人爭】傳余詠珊截糊 搶先梅小青簽法拉回巢
2016年07月28日07:00

ViuTV開台之後,搶走咗唔少年輕網民,之前大台播大陸劇收視又麻麻,所以都急急簽咗唔少昔日嘅猛將回巢拍劇。連皇牌監製梅小青、劉家豪夫婦都回巢,仲話要拍《溏心風暴3》。咁啱最近同男神黃子華合作演舞台劇嘅陳法拉仲係梅小青好想邀請入劇組嘅人選。不過有周刊就指邀請法拉回巢都鬧出羅生門。

話說法拉2013年離開大台之後同陳慧琳嘅經理人鍾珍短期合作,接拍大陸劇《風中奇緣》同做咗唔少商演賺人仔。不過法拉就冇為咗錢而留喺內地,反而賺完錢就去進修,報讀紐約茱莉亞學院為期4年嘅戲劇碩士課程。如今被黃子華力邀合作舞台劇《前度》,人氣仲因此而急升。據知因為咁而成為搶手貨。

報導話回巢嘅梅小青同劉家豪夫婦想打嚮頭炮,開拍《溏心風暴3》,想力邀法拉演其中一角。有指佢哋傾過兩次,製作部都已經知道。但係大台高層權鬥,余詠珊同杜之克都睇仲法拉,所以想同梅小青鬥搶法拉。仲話趁法拉於舞台劇休息期間,約咗佢返大台嘅Canteen見。報導話余詠珊想搵法拉返去拍《使徒行者2》,係女二角色,仲話會開套新劇畀法拉擔正,人工更加多幾倍,擺明要搶到法拉喎。

法拉之後回應傳媒笑言:「點解我唔知嘅?」究竟係未傾成所以唔講得,定係真係唔知呢?大家又想唔想睇法拉回歸公仔箱呢?

關注我們Facebook專頁
    相關新聞
      更多瀏覽