〈娛樂乜乜乜〉野生捕獲Pokémon
2016年07月26日12:30

【now.com】呢兩日,如果在街上,有人舉起部手機,但係又好唔專心咁望來望去的話,咁呢個人就一定係玩緊Pokémon Go。等到頸都長,全球大熱的AR實景手機遊戲Pokémon Go,昨日終於在香港上架,火速掀起熱潮。一班潮童宅女向來奉冷氣為人類史上最偉大發明,但昨日開始不但不怕酷熱天氣警告,更在烈日當空下跑到身水身汗,咁神心就係為咗捉精靈。

原本都擔心在街上,無端白事停低拋出精靈球有點戅居,但見有更大班人圍住電燈柱、聚集公園內、跑上行人天橋,都係為咗捉精靈,自己都玩到心安理得點。正如曹仁超生前所講,人的成功有百分之七十因為跟住個勢,大家都係跟住個勢玩吧!而且不少明星偶像都有玩,蘇麗珊、游學修等都有跟大家分享捕捉心得,

遊戲大受歡迎,因為遊戲畫面跟現實生活完全接軌,一收到提示,打開手機,屋企床頭有隻、等巴士隔離有隻、搭車對面位有隻、返到公司老闆檯面又有一隻,無處不在的感覺跟卡通本身的故事設定一致。試諗諗,當年有賽車Game新增香港賽道,見到如真一樣的街景,大家都歎為觀止,興奮莫明,咁更何況而家直頭在你身邊捉到隻精靈,畫面同個人生活緊緊相扣,自己就好似卡通片的主角小智一樣,完全以第一身感受,試問咁有創意的玩法,又點會唔投入呢?

當然,遊戲推出第一日已經有人投反對票,唔明有乜好玩?捉到之後又要同人鬥CP值又盛……其實唔難理解,情況同你野生捕獲明星一樣,就以經常出現人群中的發哥為例,如果你終有一天,無意中見到發哥在你眼前,生理自然反應就係要衝上前,而偶像被你捕獲一刻時,係咪好興奮先?咁興奮時刻係咪要影相留念先,於是你又即刻拎部精靈手機出嚟,率先將發哥「收服」?好自然,仲會Post番張Selfie出嚟同大家閃下威下添,情況咪就係一樣咁開心囉。不過唔知呢個遊戲有冇發哥咁襟興呢?

文:余建

〈娛樂乜乜乜〉逢星期一至五刊登

將每日的娛樂熱話,以全新角度為大家點評,大膽假設,細心求笑,希望滿足到去到邊度都好鍾意睇娛樂新聞的你。

專欄屬作者個人意見,不代表本網立場。

關注我們Facebook專頁
    相關新聞
      更多瀏覽