【讀過酒店管理】佘詩曼內地真人騷煮入四強
2016年07月15日07:00

佘詩曼離巢,之前參加內地真人騷《星廚駕到3》,大展高超廚藝。

話明係真人騷又係比賽,當然要考盡各位參賽者。阿佘就畀大會嘅指定烹調「頭部」菜式難倒喇!原來佢抽中咗牛頭,拍攝時隻牛頭雖然洗好,但就成隻擺喺佢面前,真係睇見都重口味。阿佘話開始時都唔知點算,好在後尾諗到可以煮牛脷先過到關,不過佢話:「諗番拉條牛脷出嚟嗰刻,真係幾驚嚇。」

之後阿佘同秦海璐、何潔等參加者分別喺到上海、三亞、澳門等地進行廚藝激戰,最終成功殺入四強,喺澳門站,佢以盆菜同法國鵝肝贏得冠軍。阿佘笑言自己平日太少入廚,入到四強已經算係「超額完成」。

阿佘曾經喺瑞士修讀酒店管理,廚藝都係當時訓練返嚟。阿佘又謂參加比賽好有滿足感,仲話鐵柱係可以磨成針。佢話有壓力時,可以啟發到自己另一方面小宇宙,笑言自己好似大師級咁。佢希望可以盡快完成賽事返香港,煮餐九大簋孝敬媽媽同一班好姊妹。

關注我們Facebook專頁
    相關新聞
      更多瀏覽