毛里裘斯 歎Resort!! 跳入印度洋游玻璃水
2016年06月21日19:45

夏天熱浪殺到埋身, 香港 頓變蒸籠!連馬仔都要唞暑,何況一年做足365日、OT時間多到贏晒全球的香港人!想像下,放低工作身住五星resort,望出窗水清沙幻十足天堂,再跳入李斯德林玻璃水,呢種先係堅・帝王式假期。不要只是想,一於趁暑假,玩豪一點!記者今次率先試住避世天堂 毛里裘斯 的新Resort,睇完立即向老細請假啦!

撰文:yuki(毛里裘斯)|圖:hai(毛里裘斯)、有關機構

下頁續

毛里裘斯 跳入印度洋玻璃水

馬爾代夫早就被蜂擁而至的中國客攻陷,記者今次決定直飛同樣位於 印度洋的絕美海島── 毛里裘斯 !講靚水,不亞於馬代,價錢仲要平一截。撞正 5-9月當地酒店淡季,天氣都好適合濕身玩水,依家正好睇定機票酒店,暑假出發!

酒店範圍超大,有43公頃,要行勻整個resort,隨時要大半個鐘。

位於島上東部的Le Touessrok Resort and Spa,去年被香格里拉集團收購兼大翻新,洗走原有的土豪味,加入大自然元素,開放式大堂自然通風和採光,踏入酒店一刻,就已知今次實無介紹錯!事關酒店建於海灣之中避開強風湧浪,一眼望去近岸水色清澈可見底。加上坐擁3個1公里長私人沙灘,200間 套房和3間villa沿住海岸線興建, 玻璃水垂手可得。難得入住這間5星酒店,入門級的Deluxe room 只要二千零蚊一晚,過一個超梳乎假期,絕對值得。

酒店被3個沙灘包圍,由酒店房直落沙灘唔使1分鐘。
每朝打開落地玻璃門見到層次分明的水色,好心情可以維持一整日。 無盡藍海挑戰水上飄

酒店最正是房價已包所有非快艇推動的水上活 動,自問是「見光死」的怕曬港女,都禁不住要玩個夠本。在酒店時間,我們全天候泳衣打底備戰,興之所至就可以跳入海中。基本的獨木舟、風帆、滑浪和浮潛,以至這兩三年先興起的直立板(Stand Up Paddle)同樣免費任玩,我當然選擇玩新嘢,同時可以近睇玻璃水有幾透明!見我新手,教練建議先以趴或跪練習,不過自問平衡力佳,我決定即時越級挑戰standup 玩。由最初左搖右擺,到能夠輕鬆以槳控制方向,上手時間只要10分鐘,難度不高。

教練在出發前教路,不過就唔會跟埋落水陪玩。
掛住影相,Model差點被沖到老遠,最後要使出吃奶氣力遊返岸。

下頁續

望住清澈見底的玻璃水,海草和礁石遍布海床,偶有魚仔彈出水面,靚景下玩足一粒鐘都不覺悶,划到攰,又可以躺在板上休息。

新手可先以跪姿划出海,有信心再企住玩。
酒店沙灘向東,參加朝早的瑜伽班,仲有機會睇埋日出。

教練指酒店鄰近海域較少風浪,很適合玩直立板,因為遇上強風逆流,氣力較小的女仔隨時被沖出公海無法回 岸。有豐富玩水上活動經驗的model 沙律提醒:「玩直立板比起獨木舟,視野更高更廣闊,睇水睇景一 流!不過要兼顧平衡和划槳,其實要好專心。好似我試過掛住影相擺甫士,被海浪沖翻,即變落湯雞。」

直立板數量不多,基本上不需要預約,建議下午三四點潮退時玩水更清更靚。

下頁續

睜開眼就是一片蔚藍

酒店原身有四十年歷史,不過去年轉老闆之後順道來個大變身,所有房間、餐廳和設施都重新設計翻新。單是裝潢都花了大半年,事關酒店佔地極大,接近48個足球場面積,房型多達9種!

Villa位處沙灘另一隅,出入要靠高爾夫車接載,有埋私家泳池,私密度最高。
趁住潮退,沙灘露出滿地貝殼和海星,小朋友都忍唔住尋寶。

入門級的Deluxe Room 有600呎,翻新後以白色為主調,採用淺色檜木傢俬,間隔四正,加上落地玻璃門面向大海,採光足具空間感。最吸引的是全部房型都配備自家露台,聽住海濤聲入眠,第二朝再讓陽光叫醒,張 開眼便是一大片蔚藍海水,認真歎!

King size bed對正玻璃海景,每朝起身都天天天晴!
所有房型都配有私家露台,睇日出、星空,好梳肝。

下頁續

如果帶埋BB 豬度蜜月, 不妨豪少少跟我們入住800呎的Junior Suite, Package 價每人畀多港幣500元,浴室和睡房空間更闊落,有埋獨立行李間和蛋形浴缸。

最鍾意我入住Junior Suite的浴室夠大,又有齊企缸和浴缸,每晚浸個泡泡浴夠晒梳乎!

走出房門,娛樂活動亦有很多選擇,除免費水上活動之外,酒店內單是泳池就有2 個,3個沙灘放上逾200張躺椅,即使正午時分亦不會逼人嘈吵。另外又有接駁船前往私人島Ilot Mangénie,基本上足不出戶hea 足一日都不會喊悶。

Room service超快手,借board game、送花搞驚喜都得,基本上可以懶洋洋在房過足一日。
酒店兩個泳池同樣面朝大海,任何時刻都被蔚藍色包圍。

當地人 Vicky & Chamroo

「酒店出名景靚環境好,所以趁住結婚周年慶祝,我哋決定豪一次,環境真係好似天堂。」

英國遊客 Mr & Mrs Maltese

「我們以前住過一次,服務好海景又靚,所以知道酒店在去年底大翻新,專誠再來打高爾夫和玩水。」

職員Shin

「酒店面積大,為免客人等太耐,我們送餐都要靠segway。」
Check-in先來一杯凍冰冰的梅汁,酸咪咪暑氣全消。

房內貼心準備埋沙灘袋,只要泳衣放入行李,就可以安心起行。

下頁續

歎全椰宴按摩

記者每次入住resort,例必一試他 們的招牌Spa,今次Shangri-la 的CHI Spa,以 毛里裘斯 盛產的蔗糖和椰子作 為主打療程,好似幾滋潤!療程前先以暖水浸腳,並用椰奶磨砂,做完摸摸皮膚滑過布甸。一躺下床,用椰子油按壓 肩膀,在我萬分陶醉之際,技師突然拿出兩個小椰子!一下一下窩落穴位,超 「應」!聽住耳邊傳來藏式音樂,配合 水聲風聲,很快就梳乎到瞓著。加上材料揼本用英國貴價品牌ila 的產品,用 得安心,全無化學劑,香氣天然,雖然 索價比平常Spa 貴, 但一分錢一分貨,豪一次抵畀!

技師力量適中,配合椰子按壓穴位,無泰式用手指公蠻力按咁力量型,舒服得來亦紓緩肌肉緊張。
Welcome drink是奇異果、芒果和 熱情果汁,三杯落肚超fresh!
技師以椰奶漿為足部磨砂按腳, 不時問力氣夠唔夠,好貼心。
酒店被椰樹包圍,按摩用的椰子和 椰油亦是自家種植提煉,全天然。

MODEL 沙律

美中不足的是技師按到一半忍唔住用氣聲吹水,搞到我一秒由天堂跌入凡間。
雖然戶外按摩只要畀多MUR300/HK$66,但我不想曬黑啦。

CHI Spa

營業時間:8:30am-8:30pm

推介療程: Coco Massage 60分鐘 MUR3,900/HK$852

下頁續

記者試住報告

酒店兩個泳池超大,水位不深,適合小朋友嬉水。
四間餐廳之中,專食當地菜的Safran最驚喜,可以乾乾淨淨一嘗當地美食。
食厭西餐,可以去由日本廚駐場主理的餐廳Kushi。和牛入口即化有水準,不過價錢偏貴。
所有餐廳都對住海景,大量靚位。加上採開放式設計,邊食邊享受海風,環保抵讚。
Gym room健身器材夠多夠新。

位置

✓ 周邊沒有其他酒店,可以獨霸沙灘,私密度高。

X 酒店位於東部,距離市中心Port Louis 和機場頗遠,要逾1小時車程。服務

房間

✓ 當地人日常主要講法語和Creole 語,不過英文亦不錯,溝通零難度。同時有來自馬來西亞的職員駐場,廣東話和國語都OK!

✓ 超過500個職員,即使全場房爆滿,職員都多過客。

餐廳

✓ 5間餐廳提供不同國家菜式,包括中式、日式、西式和印度菜,味道有水準,唔會食厭。

配套

✓ 每隔廿分鐘就有免費接駁船到酒店私人島Ilot Mangénie 和出名玩高爾夫和水上活動的鹿 島Ile aux Cerfs,唔使齋玩酒店沙灘。

✓ 酒店Gym room 健身設備款多夠新,不做運 動的住客都可以隨時去焗桑拿。

X Spa價錢偏貴, 全身按摩最平每小時 MUR3,900/HK$852。

總評

酒店服務一流,每個職員都笑容滿面兼好健 談, 入住第一日已經記得我們的名, 好親 切。情侶結婚、度蜜月不妨豪一次,以套票價 錢計,萬三蚊坐直航、住5晚5星resort,日日 被大海包圍,諗得過!

Shangri-La’s Le Touessrok Resort and Spa

地址:Coastal Road, Trou d’ Eau Douce, 42212, Mauritius(顯示地圖)

電話:+230(0)402-7400

房價: 每晚Deluxe Room€275/HK$2,394起;Junior Suite €300/HK$2,612起;Deluxe Suite€450/HK$3,918起

交通:由機場出發約1小時,可免費預約酒店接送

網址:shangri-la.com/mauritius

$8,699起 毛里裘斯 4日2夜套票

航班: 毛里裘斯 航空

住宿: Shangri-La’s 2晚Deluxe Ocean View Room 已包:早餐及機場來回接送

出發日期:9月30日前(逢星期二、六出發)

稅項及附加費:約$850

備註: 此價格必須2人同行,每位加$500可升級至Junior Suite Hibisus Ocean View,須於6月30日前預訂; 7日5夜套票為$12,299起

查詢:安運滿Fun遊 3913 6000

下頁續

毛里裘斯 必玩1:零距離Segway睇斑馬

唔似馬代齋玩水咁悶,毛里裘斯濕身之餘,仲有得親親動物。島上西部的 Casela 動物公園足有250公頃大,刺激玩意有Zipline,又有超過1,500種雀仔、 150種動物包括駱駝、河馬、長頸鹿等慢慢睇,玩一日都玩唔完。不過我目標明 確,就是玩segway 探險,搵超可愛的斑馬零距離合照!一行人就腳踏電動車走 在泥路上,偶爾會有貪玩的小鹿跑到路中間,所以行車速度不能快,即使新手如 我都不難控制。沿路有機會見到白犀牛、鴕鳥、羚羊,行到一半終於見到眼前一 排斑馬,牠們似乎慣晒迎賓,對住一班陌生人都不害羞,乖乖企定讓我們摸 頭,看見斑馬食草,放空發呆,樣子超級可愛。掛住影相唔願走,比原定1個鐘 玩多10分鐘,導遊都無死催,讓每人都合照成功超滿足離開!

雖然斑馬好得意,但教練提醒拍攝時不要站在牠們身後。事關激嬲牠們起飛腳,都會有危險。
飼養員跟獅子很有默契,確定牠們心情靚先會讓牠們跟遊客散步。 玩命拖獅子仔行街

睇完羽量級的斑馬,終於要打大佬!平日睇獅子,多數隔住圍欄,或者坐 在觀光車之中。不過在Casela 就可以跟住牠們散步,無錯,就好似帶住狗仔落 街咁!唯一不同的,牠們不會牽上頸帶,亦沒有口罩。聽落好牙煙?我們簽署生死狀之後,在5位職員陪同下,一人拿著一根木棍坦蕩蕩出發去。獅子約2-3歲大,但每隻都及腰高,跨出每一步都好大,嬌小的model 幾乎要小跑步跟在牠們身後,扶住牠們後腿前行。事前內心又驚又怯,但實情一班活潑的獅子仔難得放風,可以走入叢林,職員又不會強制牠們行街路線,又跑又爬樹,鬼死咁興奮,當正我們一班遊客透明,只要跟實飼養員就安全。

途中有專人跟實影相,一邊玩車,一邊睇動物,仲要掛住留意鏡頭 chok,真係好忙!
Segway Safari每日只得四節,每節十個位相當搶手,建議最好提早預約。預約唔到,另有觀光車、越野車、騎駱駝等方式睇動物。
敲響個飼料箱,三四隻長頸鹿即刻由老遠跑來等開餐。掛住影相唔餵食,即刻擰頭就走,好鬼現實。
食飽就瞓,雖然被稱萬獸之王,但白獅懶洋洋的模樣又欠了幾分霸氣。
所有近距離接觸動物的活動,都需要事先簽生死狀。

Casela

地址:Royal Road, Cascavelle, Mauritius (顯示地址)

電話:+230(0)401-6500

營業時間:逢星期一至日9am-5pm(聖誕節及新年除外)

入場費: 成人MUR740/HK$162;12歲或以下小童 MUR475/HK$104

費用: Safari Segway MUR1,500/HK$328(1小時);獅子散步MUR3,750/HK$819(1小時)

交通: 由機場乘的士前往約60分鐘,價錢約MUR1,000/ HK$219(可議價)

網址:caselapark.com

下頁續

毛里裘斯 必玩2:傘下歎地道美食

路易港Port Louis 是 毛里裘斯 首都,亦是遊客必到打卡位,滿街都是手信店。在港口碼頭旁邊,更可以找 到當地人的「蒲點」中央市集,樓高兩層是島上最大的 市集,集街市買餸、熟食市場和手工藝於一身。下晝3、 4點殺入市場,先至見識到真正的當地人龍店,雖然全場 不設座位,但咖喱大餅店門外依然圍上十數個人,買完 企埋一邊就即刻送入口。問問排緊隊的街坊,原來大餅 是毛里裘斯最受歡迎街頭小食,聽完即刻跟隊排5分鐘。餅皮沾滿薑黃粉,口感煙韌,配埋三款不同醬料番 茄咖喱、黃咖喱和青咖喱可選,酸辣口味超開胃,味道不差。掃食一輪,可以沿著碼頭,吹住海風品嘗道地小食,更是寫意。

位於路易港的商場科當水門掛滿一片太陽花雨傘,裝飾主題每月更換,有時七彩色,影相一流。
咖喱大餅店隨時都有十個人排隊,每位店員都可以摩打手十秒極速即製。

椰子冧酒

當地冧酒款式、口味極多,店員指椰子味清甜,最受當地女士歡迎。

椰子冧酒 MUR475/HK$105

熱情果冧酒

毛里裘斯盛產蔗糖冧酒,多用作入饌調雞尾酒。這一款印有杜杜鳥的平民品牌,最適合買返香港派街坊。

熱情果冧酒 MUR625/HK$138
炸紅椒球 MUR5/HK$1( 兩粒)炸球Gateau piment由木豆粉、洋葱、紅椒粒炸成,是當地人早餐至愛,食落香口,不過油份高食兩粒就膩。

下頁續

Model 沙律試味

炸球細細粒易入口又惹味,令我忍唔住不停食啊!當地人教可以配水果或沾牛奶食作早餐,罪惡感無咁大。
咖喱大餅 MUR12/HK$3 Dholl puri絕對是當地人氣街頭小食第一位,煙韌粉皮中夾有黃豆和咖喱醬,味道比賣相好得多,食落有驚喜。
雲呢嗱沙冰 MUR20/HK$5雖然左撈右撈,雲呢嗱雪糕、啫喱、牛奶溝沙冰,不過味道不太甜膩,夏天飲超消暑。

Central market

地址: Farquhar Street, Port Louis, Mauritius(顯示地圖)

開放時間:星期一至六,5:30am-5:30pm; 星期日5:30am-11:30pm

毛里裘斯 實用資料

簽證

持有特區護照或BNO可免簽入境90天。

氣候

毛里裘斯6-8月為冬季,平均氣溫有23℃,雨天和颱風的機會較低。

貨幣

以毛里裘斯盧比(MUR)為流通貨幣,HK$1=MUR4.58; 需提前一星期於香港找換店預訂貨幣,或帶歐元或美金於當地機場兌換。

機票

暫時只有毛里裘斯航空Air Mauritius提供直航航班,一星期兩班,時間仲幾靚仔。來往兩地的Airbus A330 座位闊落,有成79cm,坐十粒鐘都不會太辛 苦。 另外毛航仲新增每周三班往返新加坡至毛里裘斯,可以玩兩國遊!

票價:HK$6,000起

查詢:airmauritius.com

相關文章:

搽Hand Cream @阿CHEAP

天體授業@山中遊子

7月進出台北「 桃園機場 」 要多1個鐘!? |台北|

關注我們Facebook專頁
    相關新聞
      更多瀏覽