【大台霸權?】走法律罅網上照用 環球:唔會再合作
2016年05月31日07:00

最近無綫同環球唱片傾網絡使用權續約時,雖然雙方都有意繼續合作,不過大台無啦啦提出「永久性」條款,想永久喺網上播放環球歌手嘅歌,簡單啲嚟講,大台想俾一次錢就可以用足一世,環球聽完呢個要求後,當然耍手擰頭,更即時要求大台抽起網上所有屬於環球版權嘅歌!

不過大台重播黎明劇《人在邊緣》時,就聲稱可以喺網上平台照播黎明唱嘅主題曲《人在邊緣》同插曲《如果這是情》,有報道話,環球唱片同法律部開會研究後,知道當年環球嘅前身寶麗金同無綫簽條款時,以港幣10蚊買斷呢兩首歌嘅實體播放版權,換句話講,無綫喺灰色地帶之下,可以喺網上播呢兩首歌。

環球唱片董事總經理Duncan呢日出席旗下歌手江海迦(AGA)記招後受訪,話唔計黎明嗰兩首主題曲,仲有二百幾首歌係以同樣嘅合約形式去簽訂,佢坦言,以往已簽嘅合約無辦法更改:「前輩係以十蚊賣斷,而我哋係國際公司,我哋要尊重番之前寶麗金年代啲前輩簽落啲約。」

Duncan又話,以後大家都應該冇乜機會合作,仲話,環球唱片過去係傾合約嘅時候,已經讓咗步好多步:「合約由一年變三年,仲有講明呢個係自動續約,我哋都讓晒步,如果面對一個咁唔合理嘅條款,我公司立場係唔會接受。」佢又話,覺得得ViuTV好有創意,大家理念相近,相信未來會有更多合作機會。

關注我們Facebook專頁
    相關新聞
      更多瀏覽