【鍾意做義工】亞視暖男返新工 宣揚關愛文化
2016年05月25日07:00

亞洲電視已經熄機,員工亦都各散東西,有啲仲好快搵到新工,好似「六合彩之子」蔡國威同袁潔儀早前就正式簽約TVB,成為大台一份子,而陪住亞視走到最後一刻,有「暖男」之稱嘅前亞洲電視公關及宣傳科高級經理黃守東,原來亦都搵到新工!

其實黃守東喺返新工前,除咗出席講座之外,仲拍埋廣告同電影,更有七間機構想請佢做公關,包括製作公司、網絡電視台同政治組織等,不過阿東最終去咗香港義工聯盟做助理總幹事,佢接受報章訪問時話,因為呢個組織同亞視有淵源,佢曾經帶領過亞視嘅「感動香港義工隊」參加過義工聯盟嘅活動,加上佢都好鍾意做義工,所以就選擇加入聯盟,扶持弱勢社群同宣揚關愛文化。佢話,開工嘅第一項工作係幫手推廣「全港義工服務日」同成立青年義工團。

雖然已經返新工,但佢都不忘亞視,仲希望新投資者司榮彬嘅重組計劃可以成功,問到亞視仲拖欠佢兩個月薪金,同超過160日假期,佢話:「順其自然。亞視同我有不能分割嘅感情,相信佢哋會作出合理安排。」

關注我們Facebook專頁
    相關新聞
      更多瀏覽