[又開定房]周揚青等小豬收工度春宵
2015年06月23日07:00

台灣天王羅志祥(小豬)早前畀內地節目《全民星探》踢爆去上海工作期間,連續兩晚去咗有「小Angelababy」之稱嘅內地網路紅人周揚青間房過夜。正所謂「人贓並獲」,小豬其後選擇勇敢認愛,於微博以一句「是的!謝謝大家!」默認同周揚青嘅戀情,令粉絲們相當不滿!

有粉絲覺得周揚青根本配唔起小豬,於是就搵出周揚青嘅舊相,兼起佢底,批評對方曾整容,人身攻擊周揚青。但不得不說,周揚青係幾犀利的!對於網民鬧佢整容,佢大方承認。對比返以前同小豬傳過緋聞嘅女星,男方都以「只是朋友」作回應,唯獨周揚青一人贏得「準豬嫂」地位,你都咪話唔犀利!

小倆口目前打得火熱,愛得纏綿,近日再被《全民星探》影到周揚青,又喺酒店等男友小豬工作完,約喺酒店房見面。當日羅志祥錄完節目,成程戴黑超遮面低頭行,去到下榻酒店對面嘅一個商場行街,由助手陪住佢去咗一間潮牌服飾店揀衫,又去咗名錶舖買手錶,之後就返去下榻嘅香格里拉酒店。有網民指,羅志祥當時係買情侶錶,同周揚青一人一隻咁話。

正喺羅志祥揀手錶嗰陣,《全民星探》直擊周揚青現身上海機場,身穿黑色超短裙,不時撳手機,玩微信,唔知係咪同男友羅志祥報告自己嘅行蹤呢?之後,一個女友人去接周揚青機後,落機後一齊去咗行街,之後周揚青就返咗羅志祥入住嘅酒店,等男方去搵佢。戀愛中嘅情侶真係痴纏,見少陣都唔得架!

關注我們Facebook專頁
    相關新聞
      更多瀏覽