剛柔行者黃愷傑
2014年11月19日14:45

「星二代」挾着父母之名闖娛樂圈,雖然話走了捷徑,但要在圈內站穩陣腳,突圍而出,除了靠父蔭母蔭及先天資質,還有賴後天培養。 現年二十七歲,擁有五呎十吋身高,甫入行已被人大讚靚仔的黃愷傑(Wesley),集港姐靚媽趙雅芝和律師型爸黃錦燊的優良基因,不僅擁有濃眉大眼的俊秀臉蛋,更是文武雙全的新生代。 碩士畢業的他,有八級鋼琴的造詣,熱愛運動,又是自由搏擊及國術高手,加上勤於健身,練成一身結實的肌肉,剛柔並重。「我明白做演員,要無時無刻都裝備好自己,等不同的機會到來時,我也可以隨時出擊。」 如此認真,難怪未正式入行已有不少演出的機會。與一眾「星二代」同站在起跑線上,明顯高出幾班! 撰文☆洪雯慧 攝影☆梁比利 場地提供☆富豪酒店 (銅鑼灣)、Wunique Thai-Boxing & Fitness 服裝 提供☆GUESS 設計☆吳俊彪 文武雙全 訪問當日,坐在鋼琴前的Wesley,邊展現出一雙迷人電眼,邊用十指在琴鏈上遊走,展現出色的琴技。及後拍攝場地轉到拳館,他又火速換上戰衣,向沙包做出連串踢腿、出拳的動作,勁度十足。「其實我細個已好鍾意彈鋼琴,五歲時問媽咪可唔可以學,一學就學到八級。除了鋼琴,我亦好鍾意運動,以前爸爸成日都會帶我同明星足球隊踢波,但自從佢轉做律師後就少咗落場。入行之後,為了鍛煉靈活的身手,爸爸介紹我跟一位前武師學拳,只要唔使去外地工作,我都會一星期跟佢練一至兩日,為迎接演出不同的角色做好準備。」 北京尋夢 Wesley自小已愛看電視和電影,小時候的他,每天都會追看當時熱播的動畫片:「記得三、四歲開始,已經對迪士尼、芝麻街等卡通片好好奇和着迷,成日會諗,點拍嘅呢?到漸漸長大,我又好鍾意睇電視劇和電影,文藝片、愛情片、武打片統統都飱,最鍾意睇梁家輝嘅戲。」 中學時期,他仍未諗過長大後會做演藝工作,「因為我對business興趣大啲,所以大學時期,我揀了到南加州大學修讀工商管理。畢業後,我曾任職酒店和銀行的工作,不過每天一式一樣工作卻令我感到沉悶,當時日日返工都好唔開心,於是我就問自己係咪真係鍾意呢啲工作。」 思前想後,他決定「轉行」,並毅然獨個兒到北京電影學院修讀表演系碩士課程,今年六月才正式畢業。「剛剛到北京時,我一句國語都唔識,於是我一邊看電視,一邊學國語,幸好我亦遇到一班好同學,有時上堂聽唔明老師講課,佢哋都會慢慢教我。就讀三年期間,有劇組嚟學校選角,我真係好好彩,有幸參與其中四部作品。當中包括青春愛情電影《很想和你在一起》、《對不起,我愛你》、《珍珠島的天空》,及驚慄懸疑電影《按摩師》。在《按摩師》我有機會與前輩林保怡合作,又到泰國拍外景,雖然戲份唔算好重,但總算將學到的知識,在課堂以外,實實在在地運用出來。我有叫媽咪睇,佢有畀意見,提點我邊度需要改善。」 去年Wesley還入圍荷李活電影《變形金剛4》第二輪試鏡,但最後因工作撞期而無奈退出。 因母之名 Wesley稱喜歡演戲並非受父母感染,因為小時候父母甚少帶他到片場,他說:「由細到大,父母都畀好大自由度我,又教我先要搵到自己的興趣,再選擇工作,咁先會熱情投入,所以無論我做business定演藝工作,咁多年佢哋都咁支持我每個決定。」 其實在內地讀書時,Wesley已因「星二代」身份被注目,初時他十分抗拒。「我好想靠自己做出成績,卻被人掛了個名:『佢係趙雅芝個仔』,後來想通了,始終是父母,改變不了,惟有順其自然。」 地獄特訓 入行後,他更希望可以靠自己打響名堂,「其實只要媽咪開口,一定有唔少uncle、auntie幫我,不過我真係唔想咁做,好想靠自己搵機會,如果成功咗,滿足感會大好多。」Wesley既有父母遺傳演藝細胞,又有紮實演藝知識作根基,走上演藝之路,他充滿希望:「入學三年我學識好多台前幕後的知識,現時先做好幕前工作,希望再過十年可以做導演。而且我想自己的演藝路線可以廣闊些,無論動作、文藝、劇情片全部我都想試。」 Wesley憑俊朗外形,甫加入影壇已獲不少演出機會,近日更得到新加坡著名喜劇導演梁智強賞識,獲邀在電影《新兵正傳3之蛙人》中擔演男主角之一。他為了在新片中演出特種部隊「蛙人」角色,考取潛水證書外,拍攝前又親身接受地獄式訓練。「阿爸話,年輕人應該離開溫室,接受磨練,先可以做個真正男子漢。佢亦相信我平時有操開,足以應付呢啲場面。」 感情專一 雖然事業剛起步,但愛得大方的他,卻一早公開有個拍拖八年,感情穩定的女朋友劉凱茵(Denise)。剛入行便公開認有女友,問他會否擔心影響到粉絲對偶像的幻想?他笑說:「我哋讀書時已經認識,所以無咩必要隱瞞。」他更坦言二人早已互相見家長,雙方已達談婚論嫁階段,「我哋都有傾過結婚,不過一切順其自然,媽咪都大讚Denise又乖又純。」 即使入行後誘惑多多,他亦拍晒心口,向女友大派定心丸說︰「係花心嘅,唔需要加入娛圈都識到女仔,最重要係自己嘅人品。我係一個專一嘅人,加上我哋成日都會溝通,所以女友好放心。」 踢沙包勁度十足,他表示現在每星期都會到拳館操練,期望任何角色都能應付到。 盡得父親優良DNA的黃愷傑,擁有八級鋼琴造詣,坐在鋼琴前的chok樣已迷倒不少少女。 除了打拳、足球及鋼琴,原來他亦是一個Wakeboard高手,不時都會相約三五知己出海大展身手。 ▲▲早前參與電影《按摩師》演出,並有幸與前輩林保怡合作,「他教我演技,教我揸槍,在戲內或戲外,都獲益良多。 黃愷傑擁有一對十四吋強而有力的臂彎,加埋一副迷人的眼神,難怪被選為星二代最型之選。 ▲黃愷傑與黃錦燊父子情深,無所不談。兒時父親常駕着電單車與他外遊,到現在他入了行,父親亦不時在其身邊給予意見,猶如朋友。 ▲黃愷傑五歲生日時,父母為他舉行生日派對。問他入行後會否想與父母一同演出,他笑說:「唔好啦!始終私生活同工作應該分開好啲。」 ▲黃愷傑童年時已十分鬼馬,愛在鏡頭前整蠱作怪,十分可愛。 黃愷傑比很多新人幸運,未正式入行便拍了幾部電影,最近更獲新加坡名導演梁智強睇中,邀請他在最新作品《新兵正傳3之蛙人》中演男主角。 ▲黃愷傑與圈外女友劉凱茵(Denise)拍拖八年,不時在網上公開二人的合照,並坦言視對方為結婚對象。 ▲他與女友劉凱茵,早已互見家長,一二年,二人更首次與男方父母一同出席慧妍雅集三十周年慈善晚會。

關注我們Facebook專頁
    相關新聞
      更多瀏覽