劉家輝「好難笑」 網民鬧爆《東張》做騷
2014年05月10日08:00

香港最有人情味嘅地方真喺非TVB莫屬,佢認第二就絕對無人敢第一。日前TVB安排劉家輝重返電視城,節目喺《東張西望》播出,自家輝中風後,今次都喺第一次返黎舊地,所以當家輝見返一班老友,如米雪、許紹雄盧宛茵等人,佢都顯得好興奮。

但興奮還興奮,主持人林映輝(輝仔)成日走去問家輝:「開唔開心呀?」,其實輝仔當你問呢句說話個陣,你有無諗過對方喺個曾中風嘅病人呢? 家輝控制面部肌肉喺有一定嘅難度架,你估人地唔想笑架? 輝仔問多兩問,家輝就好尷尬咁話:「好難笑呀。」

逼人笑都算喇,喺最後一個環節,輝仔就同米雪準備左啲禮物送比家輝。禮物大定細其實就無關係,正所謂物輕情義重,送啲咩家輝都一定好開心嘅。但喺鏡頭一轉,份禮物竟然喺隻TV Buddy......相信大部分家庭觀眾呢個時候都呆左望住電視機,但輝仔仲要加多句:「你見到呢隻野,就會諗起我地架喇。」點諗起你地呀,咪玩喇!

節目做到呢到都差唔多完,返到去《東張》個錄影廠,個主持嫌仲未夠溫情,加多句:「完全表現出TVB呢個大家庭喺幾咁充滿人情味!」

睇完依一集《東張西望》,大批網民覺得好反感:「有邊個前tbb員工會話呢間公司有人情味。劉師傅咁俾人擺上台真陰公,俾人推住電視城一日遊。tbb知唔知道越係做呢啲多餘嘢越係令人反感。有冇人情味,關啲節目咩事呢,冇質素就係冇質素,垃圾西遊記收視係唔會升架。」、「又唔係今日先中風,有心一早見咗啦,仲喺度懶有人情味」等等。凡事over過頭絕對唔喺一件好事,醒啲喇無記!

關注我們Facebook專頁
    相關新聞
      更多瀏覽